په جنوبي کوریا کې یوې محکمې د حکومت د لنډمهاله پوځي کېدو له کبله د استیضاح شوي ولسمشر یون سوک یول د توقیف حکم تایید کړی دی.

د جرمني خبري اژانس د راپور له مخې، له دې اقدام سره به لومړی ځل وي چې د جنوبي کوریا یو ولسمشر د خپلې واکمنۍ پر مهال توقیفیږي.

تر اوسه د یول د توقیفولو کره وخت مشخص شوی نه دی.

تر دې وړاندې د جنوبي کوریا د دفاع وزیر له ولسمشر سره د حکومت په پوځي کېدو کې د همکارۍ له کبله نیول شوی دی.

د جنوبي کوریا ولسمشر په دې وروستیو کې پوځي حکومت اعلان کړ، خو د پارلمان تر اعتراض او د خلکو له اندیښنو وروسته یې بیرته لغو او له خلکو یې بښنه وغوښته.

تر دې اقدام وروسته پارلمان هغه استیضاح کړ او تور یې پرې ولګوه چې له جنایي څیړنو د ځان او کورنۍ د خلاصون په هدف یې پوځي حکومت اعلان کړی و.

د اقتصادي پراختیا په برخه کې د ایران د ولسمشر مسعود پزشکیان استازی وایي، د ایران حکومت له امریکا سره د " مخامخ خبرو" هوکړې ته رسیدلی او باید د امریکا له منتخب ولسمشر ډونالډ ټرمپ سره خبرې وکړي.

د ازادې اروپا/ازادۍ راډیو د ایراني څانګې راډیو فردا د راپور له مخې علي عبدالعلي زاده د سه شنبې په ورځ ( د مرغومي په ۱۱مه) ویلي، ایران یوه نوي بهرني سیاست ته اړتیا لري.

هغه ویلي، نه شي کولای چې د خپل هېواد مسلې معلقې وساتي او په خبره یې باید خبرې وکړي او له خپلو ملي ګټو دفاع وکړي.

له امریکا سره د مخامخ خبرو په اړه د ایران د یوه لوړپوړي چارواکي دا ډول څرګندونې کم سارې دي.

تر دې وړاندې د ایران ستر مشر علي خامنه یي څو ځله له امریکا سره د مخامخ خبرو مخالفت کړی دی.

ایراني چارواکي دغه څرګندونې داسې مهال کوي چې ټاکل شوې درې اونۍ وروسته ډونالډ ټرمپ بیا سپینې ماڼۍ ته ولاړ شي.

ټرمپ د واکمنۍ په لومړۍ دوره کې د ایران او د نړۍ د قدرتونو ترمنځ له اټومي تړونه ووت او پر ایران یې بیرته بندیزونه ولګول.

اوکراین نن ادعا وکړه چې په لومړي ځل یې د یوه سمندري ډرون په وسیله د روسیې یو پوځي هدف په هوا کې ویشتلی دی.

د اوکراین د پوځي استخباراتو ادارې GUR نن (د ډسمبر ۳۱مه) پر خپل ټلګرام چینل په یوه بیان کې وویل چې په دافع هوا سمبالې د دې هېواد بې ماڼو کشتۍ یا سمندري ډرون د کریمیا په لویدیځو سواحلو کې د روسیې یو مي اته ډوله هیلیکوټپر راغورځولی دی.

بیان زیاتوي چې د اوکراین سمندري ډرون د روسیې یو بل هیلیکوپټر هم وویشت خو دې هیلیکوپټر ځان د روسیې یوې هوايي اډې ته ورساوه. GUR له دې بیان سره یوه ویډیو هم خپره کړې ده، خو آزادي راډیو په خپلواک ډول د دې ویډیو رښتینولي نه شي تاییدولای.

دا ادعا داسې مهال کېږي چې د اوکراین او روسیې ترمنځ جګړو زور اخیستی دی.

د نیوزیلنډ اوکلنډ، لومړی لوی ښار شو چې نن یې ۲۰۲۵ کال ته هرکلی ووایه.

په دې ښار کې زرګونه کسانو په سیمه ایز وخت د شپې د دولسو بجو له نژدې کېدو سره د ثانیو چپه ګڼل پیل کړل او د کال له بدلون سره سم یې د اورلوبو په بدرګه د خوښۍ نارې پیل کړې.

له نیوزیلند څخه د دوو ساعتونو په توپیر په اسټرالیا کې نوی کال پیلېږي. هرکال له یو میلیون ډېر خلک په سیدني کې راټولېږي او د دودیزې اورلوبې ننداره کوي.

نن د ۲۰۲۴ میلادي کال په وروستۍ ورځ په نیویارک، لندن، پاریس او د نړۍ په ډېرو نورو ښارونو کې هم خلک د نوي کال د رارسېدو په ویاړ جشنونو ته تیاري نیسي خو په ۲۰۲۴ کال کې د منځني ختیځ او اوکراین جګړو سږکال د دې جشن پر مراسمو سیوری غوړولی دی.

د اوکراین په بېلابېلو سیمو کې نن سهار وختي د هوايي حملو د خطر زنګونه ووهل شول او د پلازمېنې کییف په ځینو سیمو کې د چاودنو راپورونه ورکړل شوي دي.

د هوايي حملو خبرداري په چیرني هیف، سومي، پولتاوا، لوهانسک، دنیپروفسک، زاپوریژیا، کییف او څو نورو سیمو کې واورېدل شول.

د کییف د پوځي ادارې مشر سیرهي پوپکو وویل چې د دې ښار پر یوه ناحیه د توغندیو چرې راپرېوتې دي. د دې حملو د تلفاتو په اړه جزییات نه دي ورکړل شوي.

په سومي کې هم سیمه ایزې پوځي ادارې وویل چې د روسیې یو توغندی د شوستکا ښار ملکي تاسیسات زیانمن کړل خو د تلفاتو په اړه یې څېړنې پیل شوې دي.

د روسیې دا حملې داسې مهال کېږي چې متحدوایالتونو پرون له اوکراین سره د ۲،۵ میلیارد ډالرو په ارزښت تازه مرسته اعلان کړه.

نن چې د میلادي کال وروستۍ ورځ ده، د نړۍ په ډېرو ښارونو کې خلک د ۲۰۲۵ کال د رارسېدو په ویاړ د جشنونو جوړولو ته تیاري نیسي.

د نیوزیلنډ په ګډون د جنوبي آرام سمندر پر غاړه پرتو هېوادونو له نورو مخکې تیارۍ پیل کړې دي ځکه هلته نوی کال له نیویارک څخه اتلس ساعته مخکې پیلېږي. د نیوزیلنډ په لوی ښار اوکلنډ کې به زرګونه کسان د کال د پیل شېبې ته چپه ګڼل پیل کړي او بیا به اور لوبې پیل شي.

دوه ساعته وروسته به په اسټرالیا کې له یو میلیون ډېر کسان په سیډني ښار کې راټول شي او د دودیزې اورلوبې ننداره به وکړي.

په جاپان کې هم نوی کال د تر ټولو لوی جشن په توګه لمانځل کېږي او په دې ترڅ کې خلک معبدونه او کورونه پاکوي او د کال د پیل په درشل کې ډېری لوی بازارونه بند دي.

د نوي کال په مناسبت د نړۍ په نورو لویو ښارونو کې هم اورلوبې کېږي او خلک یې په خوشالۍ سره لمانځي، خو سږکال جګړو په تېره بیا د منځني ختیځ کړکېچ پر دې نړیوال جشن سیوری غوړولی دی.

د ارشاد په وینا دا بس له بهاولپور څخه د پلازمېنې اسلام آباد پر لور روان و.

همداراز سیمه ایزو رسنیو راپور ورکړی چې په سند ایالت کې هم پر یوه لویه لاره په ترافیکي پېښه کې چې د یوه مسافروړونکي او یوه باروړونکي موټر د ټکر له کبله وشوه، اته کسان مړه شوي دي. چارواکو ویلي دي چې دواړه پېښې د ډریورانو د بې احتیاطۍ نتیجه وه.

سپینې ماڼۍ نن په یوه بیان کې وویل چې د دې مرستې نیمايي د اوکراین د پوځ او پاتې نوره یې د اوکراین د امنیتي ملاتړ د نوښت لپاره ځانګړې شوې. په بیان کې د ښاغلي بایډن له قوله راغلي دي چې نوموړی وايي، ده د امریکا د زړو تجهیزاتو په ګډون له اوکراین سره د مرستو د دوام او د جګړې ډګر ته د هغو د ژرترژره رسولو سپارښتنه کړې ده.

له دې څو ساعته مخکې د اوکراین ولسمشر ولودیمیر زیلینسکي ویلي و، چې واشنګټن به ډېرژر دا مرسته اعلان کړي.

دا د غزې په مرکزي برخه کې پر دغه کمپ چې د فلسطینیانو بېځایه شویو په کې پناه اخیستې ده، د اسرائیل د وروستیو اوونیو د هوايي حملو وروستۍ هغه ده، چې د راپورونو له مخې، په نتیجه کې یې ۱۵ کسان ټپیان شوي هم دي. د وفا د راپور له مخې تر دې مخکې د غزې په شمال کې پر بیت حانون د اسرائیل په یوه جلا حمله کې ۷ کسان وژل شوي وو. د اسرائیل د پوځ یوه ویاند ویلي د دغو راپورونو په اړه څېړنې کېږي. په همدې حال کې د اسرائیل پوځ ویلي چې پرون یې د غزې د شمال پر یوه روغتون په چاپه کې د فلسطینیانو شا و خوا ۲۰ افراطي وسلوال وژلي دي. اسرائیل دا په دې قلمرو کې خپل تر ټولو پراخ پوځي عملیات یاد کړي دي.

د امریکا پخوانی ولسمشر جیمي کارتر د سل کلنۍ په عمر مړ شو.

د کارتر مرکز پرون یکشنبه خبر ورکړ چې نوموړی په جورجیا ایالت کې په خپل کور کې مړ شوی دی.

کارتر د ۱۹۷۷ او ۱۹۸۱ کال ترمنځ د امریکا نهه دیرشم ولسمشرپاته شوی او په ۲۰۰۲ کال کې یې د نوبل د سولې جایزه هم ګټلې وه.

د امریکا ولسمشر جوبایډن ویلي چې د کارتر لپاره به په واشنګټن کې د جنازې د مراسمو د بند و بست امر وکړي او نوموړي زیاته کړې " متحده ایالتونو او نړۍ یو کمساری رهبر له لاسه ورکړ".

د بشري حقونو د څار نړیوال سازمان د بشري حقونو په ساتنه کې د کارتر رول ستایلی او ویلې يې دي، هغه له ولسمشرۍ وروسته هم د بشري حقونو دفاع ته دوام ورکړ.

کارتر د نړۍ او سیمې په سیاستونو کې هم مهم رول درلودلی دی.

کارتر د اسراییل او مصر ترمنځ د سولې په تړون کې منځګړیتوب کړی او دغه راز یې په ایران کې د ۱۹۷۹ کال له اسلامي انقلاب وروسته د متحده ایالتونو له ملاتړه برخمن پاچا محمد رضا پهلوي ته هم سیاسي پنا ورکړه چې د ګڼ شمېر ایرانیانو غوسه یې پارولې وه.