د طالبانو حکومت وايي، د هغو تقاعد ته نږدې کارکوونکو د کار موده يې د دوه نورو کلونو لپاره غځولې ده، چې لا هم د کار کولو توان لري.
د طالبانو حکومت وايي، د تعلیمي بنسټونو د استادانو او د نورو مسلکي، تخصصي او تخنیکي څانګو د هغو کارکوونکو د خدمت موده به د دوه کلونو لپاره وغځوي چې د جسمي او روحي ځواک په درلودلو سره تقاعد ته نږدې دي.
د طالبانو د حکومت تر کنټرول لاندې باختر اژانس د دوشنبې په ورځ ناوخته په خپله ايکسپاڼه يا پخواني ټويټر ليکلي، دغه پرېکړه د لوړو زدهکړو وزارت د وړانديز او د طالبانو د رئيس الوزراء په لارښوونه د طالبانو د معاشونو د تنظيم کمېسيون لهخوا شوې ده.
د راپور لهمخې، دغه پرېکړه د ۱۴۰۳ هجري لمریز کال د حمل له لومړۍ نېټې د عملي کېدو وړ ده.
"زه نهغواړم چې تقاعده شم ځکه د کور ټول مسووليت پر ما دى، زما کور کرايي دى اقتصاد مې خراب دىيلدا کابل کې يوه ښوونکې
پههمدې حال کې د تعلیمي ادارو په ګډون د دولتي ادارو یو شمېر کارکوونکي چې له اقتصادي پلوه په خراب وضيعت کې ژوند کوي د حکومت لهخوا د تقاعد معاش نه ورکولو ته په اشارې ادعا کوي چې، د کار کولو توان لري او نهغواړي چې په کور کې کېني.
د کابل د یوه ښوونځي ښوونکې یلدا ازادي راډیو ته وویل: "زه نهغواړم چې تقاعده شم ځکه د کور ټول مسووليت پر ما دى، زما کور کرايي دى اقتصاد مې خراب دى د کار توان لرم، کله چې د تقاعد حق نه راکوي نو موږ هم نهغواړو چې تقاعد شو، حکومت دې پرېکړه وکړي يا دې د تقاعد پيسې ورکړي يا زه کار کوم له معاش پرته ژوند راته ارزښت نهلري."
د طالبانو حکومت په داسې حال کې د تقاعد شویو کارکوونکو د کار موده غځولې ده، چې یو شمېر متقاعدین له حکومته د دوی د درې کلن معاش د ورکړې غوښتنه کوي.
د تقاعد شویو کسانو له ډلې رحمانالله د خپلو ستونزو په اړه ازادي راډيو ته وویل: "درې کاله کېږي چې تقاعد مې نهدى اخيستى، په ستونزو او سختو حالاتو کې ژوند کوو، د فرش او لوښو په ګډون مو د کور ټول توکي پلورلي زه ناروغ يم او د درملنې توان نهلرم."
نعمان یو بل متقاعد هم د ورته ستونزې يادونه کوي او وايي: "زموږ تقاعد را نهکړل شو او زه په بېلابېلو ناروغيو لکه شکر روماتيزم عضلي او مفصلې او د ملا په درد اخته شوی يم، اوس نه د ژوند او نه هم د درملنې مصارف برابرولى شو او لهدې چې سپين ږيری يم کار هم نهشم کوى."
د طالبانو مشر ملا هبتالله اخندزاده د یوه فرمان په صادرولو سره د طالبانو مالیې وزارت ته امر کړی و چې د ملکي او پوځي کارکوونکو له معاشونو دې د تقاعد لپاره پیسې نه کموي.
په فرمان کې راغلي و، د ملکي او پوځي کارکونکو له معاشونو د پیسو کمول به د ۱۴۰۳ کال د حمل له میاشتې څخه ودرول شي.
د راپورونو لهمخې په افغانستان کې د تقاعد عمر ۶۵ کاله دی او هم هر هغه مامور چې ۴۰ کاله یې په دولت کې کار کړی وي د تقاعد وړ دی.
