د ایران ولسمشر د یوه لوړپوړي دولتي پلاوي په مشرۍ په یوه درې ورځني سفر پاکستان ته تللی او هلته یې له ترهګرۍ سره د مبارزې او نورو دوه اړخیزو همکاریو په اړه بحثونه کړي.
سید ابراهیم رییسي د پاکستان له صدراعظم شهبازشریف سره تر لیدنې وروسته په یوه ګډ کنفرانس کې وویل:
" له ترهګرۍ سره د مبارزې په برخه کې د دواړو هېوادونو دریځونه یو شان دي. موږ دواړه د ناامنۍ او ترهګرۍ پر وړاندې د مبارزې هوډ لرو. د سازمان شويو جرمونو، نشه یي توکو او د هر ډول ناامنیو پر وړاندې چې نن سبا دواړه هېوادونه او سیمه ګواښي د مبارزې لپاره دواړه هېوادونه ګډ نظر لري."
رییسي به نن سه شنبه د اپرېل ۲۳ او سبا هم له لوړپوړو پاکستاني چارواکو سره لیدنې وکړي.
د ایران ولسمشر دا هم وویل چې له پاکستان سره د اړیکو د پراخولو په لټه کې دی او په خبره یې د سوداګرۍ اوسنۍ کچه د منلو نه ده. هغه وویل چې له پاکستاني لوري سره یې موافقه کړې چې د ایران او پاکستان تر منځ سوداګري به لسو میلیاردو ډالرو ته رسوي.
د پاکستان صدراعظم شهبازشریف هم د دواړو هېوادونو د اړیکو د پراخېدو هیله وکړه.
هغه زیاته کړه وخت یې دی چې تهران او اسلام اباد د پولې دواړو خواو ته اقتصادي پرمختیا او سوکالۍ ته پام وکړي.
د ایران او پاکستان سرحدي سیمې اکثر د نا امنیو شاهدې دي.
د ایران ولسمشر ابراهیم رییسي په لومړي وار پاکستان ته سفر کړی او دا سفر یې څو میاشتې وروسته له هغه ترسره کېږي د کال په پیل کې د دواړو هېوادونو اړېکې سختې ترېنګلې شوې وې.
ایران د جنوري په ۱۶مه د پاکستان د بلوچستان په زرغون غره سیمه کې د توغندیو او بې پیلوټه الوتکو حملې وکړې او ادعا یې وکړه چې د جېش العدل ډلې دوه مرکزونه یې په نښه کړي دي.
پاکستان هغه بریدونه په کلکه وغندل او په ځواب کې یې دوه ورځې وروسته د ایران په خاوره هوایي بریدونه وکړل. دغو پېښو د څه وخت لپاره د ایران او پاکستان اړیکې سختې ترینګې کړې او د دې لامل شو چې دواړه هېوادونه خپل سفیران ور وغواړي.
