د روسیې د اپوزیسیون د مشر الکسي ناوالني مړینې د ټولې نړۍ په کچه بېساري غبرګونونه پارولي دي.
د روسیې د اپوزیسیون د بندیوان مشر الکسي ناوالني مړینې د ټولې نړۍ په کچه نور پراخ غبرګونونه هم پارولي دي. روسي چارواکو پرون اعلان وکړ چې ناوالني په زندان کې د قدم وهلو پرمهال د ناروغۍ احساس وکړ او بیسده شو.
د یو شمېر هېوادونو مشرانو ولسمشر ولادیمیرپوتین د ناوالني د مړینې مسوول بللی دی.
د لاتویا ولسمشر ایدګارز رینکیویچ پر ایکس شبکې ولیکل چې ناوالني د کریملین له خوا په ډېرې بېرحمۍ سره ووژل شو.
د امریکا ولسمشر جوبایډن وویل د ناوالني د مړینې مسوول ولسمشر ولادیمیر پوتین دی.
هغه پرون په سپینه ماڼۍ کې خبریالانو ته وویل، متحدایالات غواړي د ناوالني د مړینې په اړه نور معلومات ترلاسه کړي.
د امریکا د ولسمشر مرستیالې کامیلاهریس د مونیخ په امنیتي غونډه کې د خبرو پر مهال د ناوالني مړینه د پوتین د بېرحمۍ یو بل ثبوت وباله او ویې ویل دوی چې د هغه د مړینې په اړه هره کیسه جوړه کړې وي، خو دا خبره روښانه ده چې د ناوالني د مړینې پړه د روسیې په غاړه ده.
د اوکراین ولسمشر ولودیمیر زیلینسکي چې په برلین کې د جرمني له صدراعظم اولاف شولڅ سره یوځای خبرې کولې ویل، پوتین باید د ناوالني د مړینې مسوول وګڼل شي.
شولڅ وویل، د ناوالني مړینه ښيي چې په روسیه کې څه ډول رژیم واکمن دی.
په عین حال کې د بېلاروس د اپوزیسیون مشرې سویتلانا څیخانوسکایا پر خپله ایکس پاڼه لیکلي چې د پوتین رژیم د السکاندر لوکاشینکا په مشرۍ د دې د خپل هېواد د مستبد حکومت په څېر په هرډول چې وي غواړي له خپلو مخالفانو څخه ځان خلاص کړي.
د اروپايي کمېسیون مشرې اورزولا فان دیرلین وویل، د ناوالني مړینې وښوده چې پوتین له هیچا دومره نه وېرېږي لکه له خپلو مخالفانو چې وېرېږي.
د ناټو عمومي منشي یینس سټولټنبرګ وویل چې ناوالني په محبس کې بندي و نو ځکه اوس دا ډېره مهمه خبره ده چې روسیه د هغه د مرګ په اړه ټولو پوښتنو ته ځواب ووایي.
د بریتانیا د بهرنیو چارو وزیر ډیویډ کامیرون هم د ناوالني د مړینې پړه پر پوتین واچوله او د کاناډا صدراعظم جوستین ترودو وویل چې ناوالني د ډیموکراسۍ، آزادۍ او د روسیې د خلکو لپاره یو مبارز و.
د بلغاریا صدراعظم، د اروپايي پارلمان مشرې او د نورو هېوادونو چارواکو هم د ناوالني مبارزه ستایلې او پوتین یې د هغه په مړینه ګرم بللی دی.
د روسیې د لیرې ختیځ د کارنیګی د مرکز شنونکې تاتیانا ستانووایا وايي، د ناوالني د مړینې علت چې هرڅه وي، وي به خو د ولسمشر پوتین لپاره به یوه لویه ننګونه وي.
مېرمن ستانووایا پر خپله ایکس پاڼه ولیکل چې ناوالني د روسیې د یوه اصلي او تاریخيشخصیت په توګه ظهور وکړ او د پوتین پر ضد یې د نه تسلیمېدو دریځ ونیو.
د نوموړې په باور ناوالني له ۲۰۰۰ کال راهیسې د پوتین پر وړاندې تر ټولو اصلي بدیل ګڼل کېده.
