د یونیسف اجرایي مدیره کترین روسیل وایي، د راپورونو له مخې په غزه کې له پنځه زره او درې سوو ډېر ماشومان وژل شوي چې په وینا یې دا د ټولو قربانیانو څلوېښت فیصده جوړوي.
مېرمن روسیل د چهارشنبې په ورځ د ملګرو ملتونو امنیت شورا ته وویل چې دغه ماشومان پر اسراییلو د حماس سخت دریځې ډلې ، چې امریکا او اروپایي ټولنه یې ترهګر بولي، له بریدونو وروسته وژل شوي دي.
حماس د تېرې اکتوبر میاشتې په ۷مه نیټه پر اسراییلو زرګونه توغندي وتوغول او د اسراییلو خاورې ته په ننوتو یې پر اسراییلیانو بریدونه وکړل.
د اسراییل چارواکو ویلي چې دغو بریدونو کې ۱۲ سوه کسان وژل شوي او حماس سخت دریځې ډلې ۲۴۰ تنه له ځان سره غزې ته یرغمل بیولي دي.
د حماس تر دغو بریدونو وروسته اسراییلي پوځیانو پر غزې خونړي بریدونه پیل کړل چې د ښځو او ماشومانو په ګډون یې زرګونه کسان ووژل او ټپيان کړل.
د یونیسف اجرايي مدیره میرمن روسیل چې د غزې له جنوبه ستنه شوې هلته د زرګونه ماشومانو وژل بې سارې پېښه بولي.
هغې د اسراییلو او حماس ترمنځ د څلور ورځني اوربند له معاملې چې د چهارشنبې په ورځ وشوه، هرکلی وکړ.
د د غې هوکړې له مخې به یوشمېر برمته شوي اسراییلیان ازادیږي او د دواړو لوریو په جګړو او د غزې په بمبارۍ کې به هم وقفه رامنځته کیږي.
د یونیسف اجرایي مدیره بیا دغه وقفه کافي نه بولي او غوښتنه کوي چې د وژنو د مخنیوي لپاره بېړني بشري اوربند ته اړتیا ده.
د غزې په اړه په یوه بل پرمختګ کې بیا پرون د مصر پلازمېنه قاهره د غزې د وضعیت په اړه د یوې غونډې کوربنه وه.
د روغتیا نړیوال سازمان د منځني ختیځ مشر ډاکتر احمد المندهاري وویل، دوی د غزې تړانګې پر روغتیایي مرکزونو ۱۷۸ بریدونه مستند کړي چې په وینا یې دغو بریدونو کې د ۲۵ روغتیایي کارکوونکو په ګډون له ۵۵۰ ډېر کسان وژل شوي دي.
هغه د خبرو په یوه برخه کې وویل:
" نن په غزه کې خلک خوړو، پاکو اوبو، روغتیایي خدمتونو، سرپنا او خوندیتابه ته لاسرسی نه لري. اټکل کیږي چې د غزې پنځه اویا فیصده وګړي له تاوتریخوالي د تېښتې له کبله دننه له خپلو مېنو بې ځایه شوي دي."
په غزه کې له شاوخوا یوې نیمې میاشتې جګړې وروسته لنډمهالي اوربند خلک خوښ کړي دي.
اسوشیتید پریس خبري اژانس د قاهرې په نوم د مصر د دولتي تلویزیون په حواله ویلي چې دغه اوربند به د پنجشنبې ورځې په لسو بجو نافذیږي.
د اوربند دغه هوکړه د مصر، قطر او امریکا په منځګړیتوب ترلاسه شوې ده.
د هوکړې له مخې به په څو پړاوونو کې د اسراییلیانو ۵۰ یرغمل شوي کسان د ۱۵۰ کسانو د خوشې کېدو په بدل کې چې حماس یې فلسطیني زندانیان یادوي، ازادیږي.
دواړه لوري اول ګام کې ښځې او ماشومان ازادوي.
حماس ویلي چې غزې ته به د تېلو په ګډون د بشري مرستو سلګونه لارۍ هم د تګ اجازه ترلاسه کړي.
د امریکا ولسمشر جوبایډن له دغې هوکړې هرکلی کړی او ویلې یې دي، د اسراییلو صدر اعظم بنیامین نتنیاهو د لنډمهالي اوربند د تمدید ملاتړی دی.
د برېتانیا، فرانسې، چین او روسیې په ګډون څو هېوادونو له دې هوکړې هرکلی کړی دی.
