"کله چې بېړۍ د برېتانیا خوا ته روانه شوه، په بېړۍ کې ډېر کسان سپاره وو. د اوبو څپې تېزې وې، د بېړۍ د جنراتور تېل وبهیدل او پېښه رامنځته شوه. نیمايي کسان په اوبو کې ډوب شول، ځینو ځانونه په ټیوبونو کې ټېنګ کړل او د اوبو پر سر پاتې شول، چې له فرانسې یا لندنه یې څوک مرستې ته راشي."
دا د برېتانیا او فرانسې ترمنځ، د سمندر اوبو کې د یوې ډوبې شوې بېړۍ د یوه روغ پاتې افغان سپرلۍ ادرېس خبرې دي.
ادریس وايي، بیا به په غیرقانوني توګه برېتانیا ته د تګ هڅه ونه کړي.
د دغې بېړۍ د ډوبېدو په تړاو ۴ تنه په فرانسه کې نیول شوي دي.
په دغه بیړۍ کې۵۰ تنه سپاره وو، چې ۶ افغانان ترې مړه شول.
رویټرز خبري اژانس د دې بیړۍ له څو تنو ژغورل شویو سپرلیو سره خبرې کړي.
فواد، د دوی له ډلې یو بل افغان دی چې په دې بیړۍ کې سپور و.
هغه وايي چې له پېښې درې ساعته وروسته یې د فرانسې پولیس مرستې ته ورسیدل.
فواد رویټرز ته وویل: "کله چې بېړۍ ډوبه شوه، هېڅ شی نه ښکارېدل، بېرېدلی وم، هڅه مې وکړه چې په ټوپ ځان وژغورم. د فرانسې پولیس ۳ ساعته وروسته راورسېدل."
په همدې حال کې د پناه غوښتونکو د دې بېړۍ له ډوبېدو وروسته په فرانسه کې څلور تنه نیول شوي دي.
د فرانسې قضايي سرچینو ویلي، چې د دوو عراقیانو او دوو سوډانیانو خلاف یې دوسیه پرانېستې ده.
د پاریس د څارنوالۍ ویندوی ویلي، چې قاضیان د غیرقانوني مهاجرت لپاره د غیرقصدي قتل او جنايي دسیسې د جرم په اړه څېړنه او ګروېږنه کوي.
پر نیول شویو عراقیانو شک دی، چې د انساني قاچاق د یوې شبکې غړي دي.
