د طالبانو د حکومت د بهرنیو چارو وزارت سرپرست وايي، د پاکستان حکومت او ټيټيپي یا تحریک طالبان پاکستان باید خبرو ته سره کېني.
امیرخان متقي وايي، هیچاته اجازه نه ورکوي چې د افغانستان له خاورې د نورو پر ضد کار واخلي.
متقي دا خبره د اسلاماباد د ستراتیژیکو څېړنو په انسټېټوټ کې د هغې پوښتنې په ځواب کې وکړه چې د طالبانو حکومت د ټيټيپي په شمول د نورو وسلهوالو او ترهګرو ډلو پر ضد څه کوي؟
د طالبانو د بهرنیو چارو وزارت سرپرست د تحریک طالبان پاکستان اوږده سابقه یاده کړه او ویې ویل، په کار ده چې د پاکستان حکومت او ټيټيپي خبرو ته سره کېني.
نوموړي وويل: "اسلامي امارت خپل مسوولیت ادا کړی دی. اسلامي امارت وکولای شول چې د پاکستان حکومت او هغوی (ټيټيپي) مخامخ سره کېنوي. د خبرو کوربهتوب یې وکړ، مذاکرات وشول. له دې هاخوا ټيټيپي کوم داسې یو تحریک نهدی چې په تېرو دوو کلونو کې را پيدا شوی وي. دا کلونه سابقه لري."
د طالبانو حکومت د ۲۰۲۱ کال په اګست کې پر افغانستان تر واکمنېدو څو میاشتې وروسته د ټيټيپي او اسلاماباد ترمنځ د سولې د خبرو منځګړتوب وکړ.
د دې مذاکراتو په نتیجه کې د دواړو خواوو ترمنځ اوربندونه وشول، چې وروستی هغه یې د ۲۰۲۲ز کال تر نومبره ټينګ و، خو پر هغې سربېره په پاکستان کې حملې روانې وې.
پاکستاني چارواکي تور لګوي چې ټيټيپي په افغانستان کې امن پټنځایونه لري او د طالبانو له بیا واکمنېدو راهیسې پر پاکستان باندې بریدونه دوه چنده شوي.
د پاکستان حکومت تور لګوي چې اکثر دا بریدونه د افغانستان له خاورې پلانېږي، هغه تور چې طالب چارواکو په کلکه رد کړی دی.
د پاکستان دفاع وزیر خواجه اصف تېره میاشت امریکا غږ سره په خبرو کې ادعا کړې وه، چې تحریک طالبان پاکستان وسلهوال په افغانستان کې دي.
متقي وویل، حکومت یې نهغواړي په ګاونډي هېواد پاکستان کې د چا وینه تویه شي، ځکه د ده په خبره د سیمې ثبات د افغانستان لپاره مهم دی.
د طالبانو د بهرنیو چارو وزارت سرپرست امیرخان متقي اسلاماباد ته د سفر پر مهال د چین او پاکستان د بهرنیو چارو له وزیرانو بلاول بوټو زرداري او چین کانګ سره هم ګډه درې اړخیزه غونډه درلوده.
دا ناسته که څه هم د مې په شپږمه شوې وه، خو ګډه اعلامیه یې د متقي د سفر په پای د مې په اتمه خپره شوه.
په اعلامیه کې راغلي درې واړو ټینګار وکړ چې خپلې خاوره کې به د تحریک طالبان پاکستان او ختیځ ترکستان اسلامي غورځنګ په شمول، هېڅ ډلې یا فرد ته د ترهګریزو او ګواښوونکو کړنو اجازه نه ورکوي.
