د بشري مرستو د همغږۍ اداره اوچا وايي چې، په افغانستان کې د کرونا وبا د خپرېدو له پیله د سږ کال د فبرورۍ تر پایه پورې ۷ زره ۸۸۶ تنه افغانان په دې ساري ناروغۍ مړه شوي دي.
اوچا په یوه راپور کې، چې پرون (جمعه) یې پر خپله وېبپاڼه خپور کړ همداراز ویلي، د سږ کال د فبرورۍ تر ۲۸ پورې په افغانستان کې ۲ لکه ۹ زره تنه په کوویډ۱۹ اخته شوي، چې د هغو په منځ کې ۹۱ اعشاریه ۳ یې رغېدلي او ۳ اعشاریه ۸ نور مړه شوي دي.
د کرونا د ناروغانو د مړینو عمده عوامل بلل شوي دي.
د اوچا د راپور پر اساس، شدید تنفسي عفونت او شدید اسهال په افغانستان کې د کرونا د ناروغانو د مړینو عمده عوامل بلل شوي دي.
د روغتیا د نړیوال سازمان د مالوماتو پر اساس، تر پرون (پنجشنبې) ماښامه پورې په درسته نړۍ کې په کرونا وبا ټولټال ۶ ملیونه او ۸ لکه ۹۷ زره ۶۷۷ تنه مړه شوي او د مارچ تر یو ویشتمې یا د حمل تر لومړۍ پورې څه باندې ۷ سوه ۶۱ ملیون تنه رغېدلي دي.
د روغتیا نړیوال سازمان یا ډبلیوایچاو د افغانستان په ۳۴ ولایتونو کې ۱۵۵ راز راز طبي کېټونه او نور وسایل وېشلي چې په راتلونکو درې میاشتو کې نږدې ۵۹ زره تنه ورڅخه کار واخلي.
د روغتیا نړیوال سازمان پر خپله ټویټرپاڼه کښلي چې، د سږ کال په فبرورۍ میاشت کې یې د افغانستان په ۱۷ ولایتونو کې دوه میلیونه او ۳ لکه تنه، چې یو میلیون او ۲ لکه یې ښڅې وې، د کوویډ ۱۹ په وړاندې واکسین کړي دي.
د دغه سازمان په وینا، د واکسین په دې کمپاین کې یې اتلس کلنو او تر ۱۸ کلونو مشرانو ته واکسین ورکړی دی.
له بلې خوا د ملګروملتو د ماشومانو د ملاتړ ادارې، یونېسف د افغانستان غرنیو سیمو ته ګرځنده طبي ټیمونه استولي چې، په دغو سیمو کې خلکو ته د واکسین د ورکولو تر څنګ د خوارځواکۍ د مخنیوي په برخه کې مرسته وکړي.
د یونېسف په وینا روغتیايي ټیمونو یې د فبرورۍ په میاشت کې ۲ لکه ۸۷ زره تنو ته روغتیايي خدمات وړاندې کړي دي.
اوچا وايي، د هدف په نوم مؤسسې هم، چې د دماغي روغتیا او رواني تکلیفونو په برخه کې طبي خدمات وړاندې کوي، په هلمند، پکتیا، غزني، خوست، بلخ او ننګرهار ولایتونو کې د کوویډ ۱۹ د واکسین ترڅنګ د خوارځواکۍ د مخنیوي لپاره خدمات وړاندې کړي دي.
