د چین ولسمشر شي جین پینګ راروانه دوشنبه روسیې ته په رسمي سفر ځي.
کرملین نن جمعه په یوه اعلامیه کې ویلي، د خبرو پر مهال به د هر اړخیز شراکت پر نورو تحولاتو، دغه راز د روسیې او چین د سټراتیژیکې همکارۍ پر موضوع بحث وشي.
د اعلامیې له مخې په نړیواله صحنه کې د روسیې او چین د همکارۍ د ژورتیا په باب به هم نظرونه تبادله شي.
د چین ولسمشر شي جین پینګ له راروانې دوشنبې تر چهارشنبې مسکو ته ځي.
په وروستیو کې د روسیې ولسمشر ولادمیر پوتین د چین ولسمشر ته د روسیې د سفر بلنه ورکړې وه.
چین تېره میاشت د اوکراین د شخړې په اړه د سولې یو پلان په ډاګه کړ، چې په کې له روسیې سره د مذاکرو غوښتنه شوې ده.
د چین په پلان کې د یوه اوربند او د نورو مکلفیتونو تر څنګ د ښکېلو لوریو ترمنځ د مذاکرو غوښتنه مطرح شوې ده.
که څه هم لوېدیځ د چین دغه پېشنهاد رد کړی، خو مسکو یې هرکلی کړی دی.
د چین د بهرنیو چارو وزارت ویلي، ولسمشر شي جین پینګ به د دې سفر پر مهال پر لویو نړیوالو او سیمه ییزو مسایلو بحث وکړي.
د دغه وزارت ویاند وانګ وینبین یوه خبري کنفرانس ته وویل، د دې سفر هدف د دواړو لویو قدرتونو ترمنځ د باور لا پیاوړي کول دي.
چین تر اوسه په اوکراین کې د روسیې غیرموجه جګړه نه ده غندلې، خو پر هغو بندیزونو یې انتقاد کړی، غرب پر مسکو د دې جګړې له کبله لګولي دي.
لوېدیځو متحدانو پر چین تور لګولی چې روسیې ته د وسلو اکمالات کوي او پیکنګ ته یې د دې کار د نه کولو خبرداری هم ورکړی دی.
د چین ولسمشر تر دې مخکې په ۲۰۱۹م کال مسکو ته سفر کړی و، خو شي جین پینګ او ولادمیر پوتین وروستی ځل په سپټمبر میاشت کې په هغه سیمه ییز- امنیتي کنفرانس کې سره وکتل چې په ازبکستان کې جوړ شوی و.
