د کابل ښار یو شمېر اوسېدونکي وايي، ماشومانو ته یې د تفریح لازمه زمینه نهده برابره.
دوی وايي، مخکې د دوی استوګنیزو سیمو ته څېرمه، پارکونو کې ماشومانو ته د لوبو ځني وسایل موجود و، چې ماشومان به ورتلل، خو دغه وسایل د زیاتې استفادې له امله مات او غیرفعاله شوي دي.
زموږ غوښتنه دا ده چې دا باید بېرته ورغول شي."
دوی غوښتنه کوي، چې دا وسایل دې بېرته ورغول شي.
د کابل ښار اوسېدونکی عاشق الله وايي: "پارکونو ته چې ځو د ماشومانو د لوبو ډېری ځایونه، وسایل، یخمالکونه، چې ماشومان ورسره لوبې کې خرابه شوي، زموږ غوښتنه دا ده چې دا باید بېرته ورغول شي."
دغه راز د کابل يوه اوسېدونکې مينه وايي: "ډېرو پارکونو کې د ماشومانو د لوبو وسایل خرابه شوي، دا ټول وسایل ترمیم غواړي او بیا دې ترمیم شي، ځکه ماشومان ضرورت لري چې لوبې وکړي."
کابل ښاریان وايي، که څه هم اوس ژمی دی او ماشومان ډېر بهر نه وځي، خو د دوی په خبره دا ستونزه د اوس نهده او ان له تېرو کلونو او تېر نظام راهیسې موجوده ده.
د طالبانو حکومت تر کنټرول لاندې کابل ښاروالي وايي، دوی به هڅه وکړي، چې دا وسایل جوړ کړي.
د کابل ښاروالۍ ویاند نعمت الله بارکزي ازادي راډیو ته وویل: "د ماشومانو د لوبو د وسایلو د ترمیم په برخه کې، کابل ښاروالۍ په مشخص ډول خپل مسوولیتونه احساسوي او موږ یو ریاست لرو په نوم د ریاست حفظ و مراقبت کار، چې د دوی همدا دنده چې زېربناوې ترمیم کړي."
ښاغلی بارکزی وايي، کوم نوي پارکونه هم، چې د دوی لهخوا جوړېږي د ماشومانو د تفریح موضوع ته به پهکې پام وشي.
د نوموړي په خبره، په کابل کې ټول ۱۴۰ تفریحي پارکونه شته او ډېر ژر به د نادرخان په غونډۍ هم یو نوی پارک جوړ شي.
دا په داسې حال کې ده، چې د طالبانو حکومت په دې وروستیو کې پر افغان ښځو د محدودیتونو د لګولو په لړ کې، تفریحي پارکونو ته د ښځو پر تګ هم بندیز ولګاوه، چې په دې سره په یو ډول، د مېندو تر څنګ ماشومانو هم له تفریح کولو راګرځول شوي دي.
