په افغانستان کې د طالبانو حکومت وايي، په چمن کې پر پاکستاني امنیتي کسانو د برید د څېړنې لپاره یې یو "لوړ پوړی هیئت" ګمارلی دی.
د طالبانو د حکومت ویاند ذبیح الله مجاهد پر خپلې ټوېټر پاڼې د سپین بولدک چمن پر لاره د وړمې ورځې پېښه د یو "نامعلوم کس کس له لوري پر پاکستاني امنیتي کسانو" ډزې بللي او ویلي یې دي چې په دې اړه "د څېړنو او عاملینو د پیدا کولو لپاره " ټاکل شوي هیئت پلټنې پیل کړي.
د تېرې یکشنبې په ورځ د کندهار سپین بولدک چمن دروازه کې د طالبانو او پاکستاني پوله ساتو ترمنځ نښته رامنځته شوې وه.
په هغو ویډیوګانو کې چې پر ټولنیزو رسنيو خپرې شوې ښکاري چې د طالبانو په منځ کې یو ولاړ شخص پر پاکستاني سرتېرو ډزې کوي او وروسته نښته پېليږي.
که څه هم دا ویډیوګانې په رسمي ډول هیڅ لورې نهدي تأیید کړي خو پاکستاني چارواکو ویلي؛ د چمن دروازه به تر هغې خلاصه نهکړي څو ورته د یوه سرتېري قاتل ور ونه سپارل شي.
په افغانستان کې د طالبانو د بیا ځلي واکمنۍ د پیل راهيسې پر سپین بولدک او تورخم دروازو پاکستان ته د اوښتونکو افغانانو سره د پاکستاني امنیتي ځواکونه د ناسم چلند او په دې پوله وخت ناوخت د طالبانو او پاکستاني ځواکونو ترمنځ د نښتو راپورونه ورکړل شوي دي.
