د ترکیې حکومت تور لګوي چې د دغه هېواد په استانبول ښار کې پرونۍ حمله د پي کې کې یا د کوردستان د کارګرانو ګوند د یوه غړي له لوري شوې ده.
د ترکیې پولیسو د استانبول ښار په توریستي برخه کې د پرونۍ چاودنې په تړاو یو تن نیولی دی.
په دې چاودنه کې، چې د استانبول په استقلال واټ کې وشوه، لږترلږه ۶ تنه وژل شوي دي.
د ترکیې دولتي تلویزیون ټي ار ټي نن دوشنبه د خپل هېواد د کورنیو چارو وزیر سلیمان سویلو په قول وویل، پولیسو یو تن چې په استقلال واټ کې یې بم ایښی و، نیولی دی.
د دې راپور له مخې، نیول شوی کس د کوردستان په کارګرانو ګوند یا پي کې کې پورې تړلی دی.
د ترکیې د کورنیو چارو وزیر ویلي چې د دې پېښې بدل به له دغه ګونده واخلي.
په پرونۍ چاودنه کې د ۸۱ تنه نور ژوبل شول.
د ترکیې چارواکو دا پېښه تروریستي حمله وبلله.
د ترکیې حکومت په لومړي سر کې ویلي و چې د استانبول پولیس ګومان کوي چې په دې چاودنه کې یوه ښځه لاس لري.
د دغه هېواد ولسمشر رجب طیب اردوغان هم ویلي وو، چې د لومړنیو معلوماتو له مخې، په استانبول کې حمله کوونکې یوه ښځه وه.
د ترکیې ولسمشر رجب طیب اردوغان چې د جي شل سرمشریزې لپاره اندونیزیا ته روان وو تر سفر مخکې په یوه تلوېزیوني بیان کې د پېښې په اړه وویل: "له هر څه مخکې، زه غواړم د هغو کسانو سره خپله خواخوږي څرګنده کړم چې د استقلال واټ په بمي برید کې وژل شوي او د هغو کسانو لپاره چې ټپیان شوي د ژر ښه کېدو هیله کوم."
په ترکیه کې د ۲۰۱۵ او ۲۰۱۷ کلونو ترمنځ د داعش له لوري خونړۍ چاودنې کېدې.
په دغو چاودنو کې د ترکیې شاوخوا ۵۰۰ امنیتي ځواکونه او عام خلک ووژل شول.
