طالبانو یو ځل بیا د پاسپورټونو وېش بند کړ.
د طالبانو د پاسپورټ ریاست یوه خبرپاڼه کې لیکلي، د تخنیکي ستونزو له امله به سر له نن یعنې شنبې به تر راتلونکې خبرتیا د پاسپورټونو وېش بندوي.
یو کس د تخار ولایت اوسېدونکی دی.
هغه د خپلې پنځهکلنۍ ناروغې لور تصویر ازادي راډیو ته رالېږلی او وايي چې هر څه ژر باید عملیات شي.
هغه تصویر چې ده ازادي راډیو ته رالېږلی، په کې لیدل کېږي چې د لور په ژبه یې لویې دانې دي.
دی وايي، د لور درملنه یې افغانستان کې نه کېږي، تر خوا په یوه ګاونډي وطن کې هم دوه عملیاته وکړل.
یاد شخص ادعا کوي چې دوه ځله یې د پاسپورټ اخستو لپاره اسناد د روغتیا وزارت د قوانینو ریاست ته وسپارل، خو هغوی ورک کړل.
نوموړي زیاته کړه: "له بده مرغه مکتوب یې ورک کړ، بیا مې بله عریضه ولیکله، د روغتیا وزارت د قوانینو ریاست کې ورکه شوه. بیا د پاسپورټ ریاست ته ولاړم و مې ویل دا ډول ستونزه لرم، له ولایت راغلي یوو، ناروغ لرو، ویل یې ولاړ شئ، انلاین نوملیکنه وکړئ او په خپل وار راشئ."
د دې ناروغې پلار ټینګار کوي چې په نوبت د پاسپورټ اخستل میاشتې وخت نیسي، داسې مهال چې ناروغ یې نور د درد زغم نهلري.
د دې ناروغې کورنۍ دا اندېښنه هم لري چې د وخت په تېرېدو او د پاسپورټ د نه اخستو له امله شاید هغه مالي امکانات یې له لاسه ووځي چې اوس ورته برابر دي.
د طالبانو د روغتیا وزارت د قوانینو له ریاسته مو د یاد شخص د اسنادو د ورکېدو پوښتنه وکړه، خو د دې وزارت ویاند شرافت زمان سره له دې چې ژمنه یې وکړه چې ځواب به راکوي، خو د راپور تر خپرېدو یې څه ونه ویل.
خو ښاغلي زمان ازادي راډیو ته را لېږلي پیغام کې دا هم لیکلي: "د دې ادارې رییس اوس بدل شوی دی."
یوه بله کابل مېشتي بیا چې نه غواړي ورته د ستونزو د پېښېدو له وېرې یې نوم راپور کې یاد شي، د طالبانو د پاسپورټ په کړنو سخته نیوکه کوي.
دا مېرمن وايي، تېر یوه کال کې یې درې ځله نوملیکنه کړې، خو تر اوسه یې د کار د مخکې تګ هیڅ معلومات نهشته.
هغه وايي: "خپله مې درېیم ځل دی چې د پاسپورټ لپاره مې غوښتنلیک ورکړی، خو د پاسپورټ درک نهشته. هر ځل چې غوښتنه کوم، وايي د دې میاشتې په ۱۵مه نېټه یې وګوره، کله چې یې وګورم، وايي یوه بله میاشت په تمه شه. تر دې میاشتې په کال واوښتې، خو زه لا هم د پاسپورټ په تمه یم. ډېرې ستونزې شته."
دا په داسې حال کې ده چې تازه د طالبانو د کورنیو چارو وزارت د پاسپورټ ریاست د دویم ځل لپاره د پاسپورټونو د وېش بهیر ودراوه.
دې ریاست یوه خبرپاڼه کې چې تېره شپه ناوخته یې خپره کړې لیکلي، د تخنیکي ستونزو له امله د پاسپورټ وېش دروي او خلک دې تر راتلونکي خبرتیا په تمه شي.
د طالبانو د کورنیو چارو وزارت ویاند عبدالنافع ټکور او پاسپورټ ریاست ویاند نورالله پتمن د تخنیکي ستونزو د روښانتیا په اړه زموږ پوښتنې ځواب نهکړې.
واک ته د طالبانو له رسېد وروسته، په افغانستان کې د پاسپورټ اخیستل یوه له لویو ننګونو ده.
د پاسپورټونو د جوړولو بهیر په ولایتونو کې درېدلی او کابل ته پسې راتګ ستونزمن هم دي او لوړ لګښت هم لري.
