د ملګرو ملتونو د بشری حقونو شورا په افغانستان کې د دې شورا د ځانګړي راپور ورکوونکي ماموریت د یوه بل کال لپاره تمدید کړ.
په افغانستان کې د بشري حقونو په چارو کې د ملګرو ملتونو د ځانګړي راپور ورکوونکي ریچارد بینیت ماموریت د یوه بل کال لپاره تمدید شو.
د ملګرو ملتونو د بشری حقونو د شورا په غونډه کې چې بیګا په ژنیو کې جوړه شوه، د ښاغلي بینیت په ماموریت کې دوه نوي مسوولیتونه چې یو د ماشومانو د حقونو لپاره کار او بل په افغانستان کې له بشري حقونو د سرغړونو ثبتول او د بشري حقونو نړیوالې شورا ته د هغو وړاندې کول هم ورزیات شول.
په افغانستان کې د بشري حقونو د اندېښنې وړ وضعیت په اړه د بېګانۍ غونډې د پرېکړه لیک مسوده اروپايي ټولنې جوړه کړې وه چې امریکا، بریتانیا، جاپان او د اروپايي ټولنې د غړو په ګډون نورو هېوادونو یې ملاتړ وکړ.
په دې غونډه کې د بشري حقونو په شورا کې د افغانستان استازي نصیراحمد اندېشه وویل چې د افغانستان وضعیت د اندېښنې وړ دی.
هغه پر نړیوالو غږ وکړ چې دې موضوع ته پاملرنه وکړي.
اندېشه زیاته کړه: "د طالبانو له خوا په پوځي زور د افغانستان د نیولو له کبله مو هېواد د ورانیو له یوه نوي پړاو سره مخامخ شوی. نه یوازې هغه بنسټونه له منځه ولاړل چې د ډیموکراسۍ ملاتړ یې کاوه بلکې د ښځو، نجونو او اقلیتونو حقوق، حتی زموږ قومي تنوع او ملي وحدت له ناورین سره مخامخ شول."
د ملګروملتونو د بشري حقونو شورا اوسمهال ۴۷ غړي لري چې له دې ډلې ۲۹ هېوادونو د افغانستان د بشري حقونو لپاره د ځانګړي استازي د ماموریت د تمدید په پلوي مثبتي رایې ورکړې، خو د افغانستان دوو ګاونډیو پاکستان او چین د ریچارډ بینیت د ماموریت د تمدید طرح رد کړه.
د چین استازي استدلال وکړ چې باید د طالبانو حکومت خپل کار ته پرېښودل شي.
د چین د استازي په وینا د طالبانو له حکومت سره د ځینو هېوادونو مخالفت په افغانستان کې د بحران باعث شوی.
چین همداراز د افغانستان بانک د کنګل شویو شتمنیو د آزادیدو غوښتنه هم وکړه.
د بشري حقونو په شورا کې د پاکستان استازي وویل چې په افغانستان کې لاهم د سولې او ثبات د ټینګښت لپاره فرصت شته.
د دې پاکستاني ډيپلومات په وینا د بینیت د ماموریت تمدید د افغانستان ستونزې نه شي حل کولای.
خو بریتانیا د بینیت د ماموریت د تمدید هرکلی وکړ او استازي یې وویل چې په افغانستان کې روان بشري وضعیت د اندېښنې وړ دی ځکه نجونې، ښځې او اقلیتونه په تېره هزاره ګان له جدي ستونزو سره مخامخ دي.
د بشري حقونو په شورا کې د امریکا استازې میشتل ټایلر له طالبانو وغوښتل چې نجونو او ښځو ته د درناوي پر ژمنه عمل وکړي.
ټایلر وویل: "موږ له نړیوالې ټولنې سره په ګډه له طالبانو غواړو چې د ټولو افغانانو بشري حقونو ته د درناوي لپاره پر خپلو ژمنو عمل وکړي او ټول لګېدلي محدودیتونه لیرې کړي."
بشري حقونو ته درناوی او د یوه ټولشموله حکومت جوړول له طالبانو سره د تعامل لپاره د نړیوالو مهمې غوښتنې دي خو د طالبانو پر سرپرست حکومت په پرله پسې ډول انتقاد کېږي چې په دې دوو برخو کې یې هېڅ اقدام نه دی کړی.
