د ملګرو ملتونو د بشري مرستو همغږي کوونکي، رامز الاکبروف ویلي، دا مهال افغانستان ته د پیسو لېږد ښايي مثبتې نتیجې ولري.
په ملګرو ملتونو کې د چین استازي هم دې ته وَرته غوښتنه کړې ده.
د امریکا متحدو ایالتونو ویلي چې د افغانستان د کنګل شوې شتمنۍ د درې نیم ملیارد ډالرو د خوشې کولو لپاره کوم پروګرام نهلري.
د افغانستان لپاره د ملګرو ملتونو د بشري مرستو همغږی کوونکی وايي، چې د روان بشري بحران د کمولو لپاره افغانستان ته د نقدو پیسو تزریق مهم رول لري.
رامز الاکبروف له کابله د ملګرو ملتونو په دفتر کې خبریالانو ته په انلاین وینا کې، د امریکا له متحدو ایالتونو وغوښتل چې د جګړه ځپلي افغانستان د اقتصاد د بیا احیا او بیارغونې لپاره د دغه هېواد کنګل شوې شتمني ازاده کړي.
نوموړي وويل: "زموږ له اړخه، ملګرو ملتونو تل په دې مسئله کې څرګند دریځ لرلی دی. له شک پرته، د نقدو پیسو تزریق او اقتصاد ته داخلي سرچینې، پر اقتصاد او بشري وضعیت مثبته نتیجه لري، ځکه د هغو احیا د فعال اقتصاد لپاره زیات ارزښت لري او کولی شي هېواد هغو شرایطو ته بوځي چې خلک په کې وکړای شي خپل خواړه برابر کړي."
د ملګرو ملتونو د بشري مرستو همغږي کوونکي زیاته کړه، دا مهال په افغانستان کې ۱۹ ميلیونه وګړي له غذايي بحران سره مخامخ دي.
د رامز الاکبروف په وینا، اقتصادي بحران زیات کسان د بېوزلۍ خوا ته ټېل وهلي دي.
بلخوا د امریکا متحدو ایالتونو ویلي، داسې کوم پلان نهلري چې د افغانستان د نږدې ۷ ملیارده ډالرو په ارزښت د کنګل شوې شتمنۍ تقریباً نیمايي، چې درې نیم ملیارده ډالره کېږي د افغانستان بانک ته ورکړي، چې د طالبانو په کنټرول کې دی.
د امریکا د بهرنیو چارو وزارت ویاند ند پرایس د دوشنبې په ورځ (د زمري ۲۴مه) په واشنګټن کې خبریالانو ته وویل، دوی د داسې لارو چارو په لټه کې دي چې دغه پیسې په مستقیم ډول افغانانو ته ګټه ورسوي.
د دې تر څنګ په ملګرو ملتونو کې د چین دایمي استازي ژانګ جون خبریالانو ته وویل، چې پهکار ده، د افغانستان کنګل شوې شتمني بېرته دغه هېواد ته وسپارل شي.
نوموړي ويلي: "له هېچا سره دا توجېه نه شته چې د افغانانو شتمني دې کنګل کړي. دوی باید ژر تر ژره دغه شتمني ازاده کړي."
کال مخکې پر افغانستان د طالبانو د ولکې له بیا ټینګولو وروسته د امریکا متحدو ایالتونو د افغانستان په ملیاردونو ډالره شتمني کنګل کړه.
وروسته د امریکا ولسمشر جو بایډن د تېر کال د سلواغې/دلوې پر ۲۲مه د یوه فرمان په لاسلیک سره امر وکړ، چې د افغانستان د کنګل شوې شتمنۍ نیمايي دې د سپټمبر د یوولسمې د قربانیانو کورنیو ته ورکړل شي او نیمايي نورې پیسې دې د افغانانو بشري مرستو ته بېلې شي.
دوې اوونۍ مخکې نږدې ۷۰ اقتصادي متخصصانو له ولسمشر جو بایډن او د امریکا د خزانې له وزیر غوښتنه وکړه، چې د افغانستان کنګل شوې شتمني بېرته دغه هېواد ته وسپاري.
