یو غیر دولتي بنسټ، چې له نورو اشخاصو او سازمانونو بسپنه ټولوي، د وژل شویو او معلولو شویو سرتېرو کورنیو یې رسوي.
دغه بنست وايي، د ژمي پر مهال یې ۱۰۰۰ دغسې مستحقو کورنیو ته بشري مرستې رسولي او په پام کې لري، نورو سلګونو کورنیو ته هم د بشري مرستو بستې ورکړي.
«د افغانستان د ملي ځواکونو د ملاتړ موسسې» یو بنسټګر، وايي، دوی توانېدلي د وژل شویو او معلولو شویو سرتېرو له سلګونو کورنیو سره د بشري مرستو لومړی پړاو بشپړ کړي.
محمد سلیم وردګ له ازادۍ راډیو سره په خبرو کې وویل، اداره یې په پام کې لري، تر لوی اختر وروسته د نورو بشري مرستو اقدام هم وکړي.
نوموړي وويل: "په داسې حال کې چې پر افغانستان بشري بحران روان دی، موږ خپلو هلو ځلو ته دوام ورکړی، که د خدای رضا وه تر اختر وروسته به زموږ بله بشري کڅوړه چې د بهرمېشتو بااحساسه افغانانو له خوا برابر شوې، هم پیلېږي، چې تر ۶۰۰ پورې کورنیو ته مرستې دي."
«د افغانستان د ملي ځواکونو د ملاتړ موسسې» بنسټګر محمد سلیم وردګ وايي، په افغانستان کې د دوی موسسې د ۲۰۲۱م کال په اپرېل میاشت کې رسمي جواز ترلاسه کړ، چې د هماغه کال د اګست میاشتې له سیاسي تحولاتو وروسته هم فعالیت لري.
ښاغلی وردګ وايي، هر سرتېری باید له هر ډول سیاسي، تنظیمي او نورو خپلمني رقابتونو لیرې وساتل شي، ځکه هر سرتېري د افغانستان د اوسنۍ جغرافیې د ساتنې لپاره لوړه کړې ده.
پر افغانستان د طالبانو د ولکې له ټینګولو وروسته شا و خوا درې نیم لکه افغان پوځیان له دندو وشړل شول او معاشونه یې نه ورکول کېږي، دوی له ډول- ډول اقتصادي ستونزو کړېږي.
د کورنیو چارو وزارت د پولیسو یوه پخوانۍ افسره، چې د امنيتي دلايلو له امله يې نوم نه اخلو وايي، یو کال کېږي، پر کور ده، چې زیاتې اقتصادي ستونزې لري.
نوموړې وويل: "
هرڅه ته اړتیا لرو، د کور له کرایې نیولې تر خوړو، کالیو، د برق بېلونه، د ماشومانو لګښتونه او نور شیان
. درې واړه ماشومان لرم، دوه د پلار ماشومان هم راپاتې دي، مور، خویندې مې هم پر کور دي، چې کار نه لرو. تاسو خپله پوهېږئ چې ګراني ده."
د طالبانو له عمومي عفوې سره-سره له ځینو ولایتونو د دغو پخوانيو پوځیانو د نیول کېدو، لا درکۍ او حتی په مرموز ډول د وژل کېدو راپورونه ورکول کېږي.
د طالبانو د شهیدانو او معلولانو چارو وزارت تېره سې شنبه وویل، په پام کې لري د تېر حکومت د شهیدانو او معلولانو په ګډون دغې ټولې طبقې ته د تېرو شپږو میاشتو امتیازونه ورکړي، خو د تېر حکومت په نسبت د شهیدانو او معلولانو امتیازات کم شوي دي.
د وژل شویو او معلولو شویو سرتېرو کورنیو مخکې هم شکایت کاوه، چې د هغه وخت حکومتونو هم لازم پام نه دی ورته کړی.
