د تاجکستان پلاز مېنه دوشنبې ښار به نن د افغانستان په اړه د یوې دوه ورځینۍ غونډه کوربه وي.
په دې غونډه کې به، چې د افغانستان د حالاتو په اړه د سیمې د هېوادونو له څو غونډو وروسته دایرېږي، د سیمې د هېوادونو د ملي امنیت سلاکاران ګډون وکړي.
په دې غونډه کې، چې نن پنجشنبه او سبا جمعه دوام کوي، د افغانستان پر امنیتي، سیاسي، اقتصادي او بشري وضعیت د نظر تبادله کېږي.
د تاجکستان په دوشنبې ښار کې د افغانستان په اړه په دې غونډه کې د هند، روسیې، چین، ایران او منځنۍ اسیا د هېوادونو د ملي امنیت سلاکاران برخه اخلي.
خو د پاکستان په اړه لا څه نه دي ویل شوي چې ایا د ملي امنیت سلاکار غونډې ته لېږي او که کوم بل استازی.
د هند د ملي د امنیت سلاکار اجیت دوفل ویلي چې د دوشنبې په غونډه کې به په افغانستان کې د ښځو د حقونو او د ټولګډونه حکومت د جوړېدا پر اړتیا هم خبرې وشي.
د طالبانو له واک ته رسېدو وروسته په ځانګړي ډول تاجکستان د ټولګډونه حکومت پر اړتیا ډېر ټینګار کړی او د منځنۍ اسیا یو شمېر هېوادونو له افغانستان څخه د تروریزم د خپرېدو په اړه اندېښنې ښوولې دي.
خو طالبانو په ځلونو ویلي چې د افغانستان له خاورې به نورو هېوادونو ته ګواښ نه پېښږي.
په وروستیو کې داعش ادعا وکړه چې د افغانستان له خاورې یې پر تاجکستان او ازبکستان توغندي ویشتي دي، که څه هم ازبکستان دا ادعا رد کړه خو تاجکستان تایید کړه.
روانه اوونۍ د طالبانو د دفاع وزارت یوه پلاوي د ازبکستان د سرحدي ګارد له قوماندان سره وکتل او هغه ته یې ډاډ ورکړ چې د افغانستان خاوره به د هیڅ ګاونډي پر ضد ونه کارول شي.