د امریکا د بهرنیو چارو وزارت وايي، که طالبان د نجونو او ښځو په اړه له خپلو پرېکړو په شا نهشي، له ډېر فشار سره به مخ شي.
د امریکا د بهرنیو چارو وزارت وايي، د ښځو په اړه د طالبانو تګلاره د بشري حقونو خلاف عمل دی او دا ډول کړنې به له نړیوالې ټولنې سره د طالبانو اړیکې زیانمنې کړي.
متحده ایالات دا خبرداری وروسته تر دې ورکوي چې طالبانو پر افغان نجونو او ښځو د جبري حجاب فرمان صادر کړ.
د امریکا د بهرنیو چارو وزارت ویاند نېډ پرایس پرون رسنیو سره خبرو کې طالبانو ته د سختدریځې ډلې خطاب وکړ او ویې ویل، داسې مهال چې په افغانستان کې د اقتصادي ناورین د مخنیوي او ټولګډونه حکومت د جوړېدو اړتیا ده، خو طالبانو د دې پر ځای د نجونو او ښځو د ځورولو سیاست ته لومړیتوب ورکړی.
هغه له طالبانو وغوښتل چې د نجونو او ښځو په برخه کې له بشري حقونو ضد پرېکړو، په شا شي.
نوموړي ويلي:"موږ له خپلو متحدینو او شریکانو سره له نږدې سلا مشورې کړي. که چېرې دوی له خپلو دې پرېکړو په شا نهشي، داسې لارې شته چې موږ به پر طالبانو د فشار زیاتولو ته دوام ورکړو، څو هغه ژمنې عملي کړي چې تر ټولو مخکې یې له خپلو خلکو سره کړې وې، نه دا چې یوازې نړیوالې ټولنې ته یې یادونه وشي. "
د امریکا د بهرنیو چارو وزارت ویاند دا هم وویل، چې په ټول افغانستان کې افغانانو د هغه فرمان سره مخالفت څرګند کړی، کومه چې د ټولنې نیمايي برخه له سختو بندیزونو سره مخ کوي.
خو د طالبانو ویاند ذبیحالله مجاهد بیا نن د سهشنبې په ورځ ازادي راډیو ته وویل، حجاب د افغانانو کورنۍ موضوع ده او د زور زیاتي په معنا نه ده.
نوموړي وويل:"افغان ښځې خپله حجاب مراعتوي. هغه یو سلنه چې پاتې دي، هغوی ته هم اختیارات ورکړل شوي دي. دوه، درې جزییات لري چې پر هغوی کار وکړي. "
که څه هم د جبري حجاب په اړه د طالبانو فرمان په افغانستان کې دننه او بهر له تُندو غبرګونونو سره مخ شوی، خو دوی د خپلې پرېکړې د عملي کولو لپاره کار پیل کړی.
د طالبانو امرباالمعروف او نهی عنالمنکر وزارت چې د جبري حجاب د عملي کېدو مسوولیت ورکړل شوی، په خپله ټویټرپاڼه لیکلي:" په کابل کې د ټولو حوزو امرینو او ولایتي مسوولینو ته د حجاب د عملي کېدو په اړه روزنیز سیمنار پیل شوی او نن یې وروستۍ ورځ ده. "
د طالبانو د اجباري حجاب فرمان او تر خوا یې له شپږم ټولګي پورته پر نجونو د زدهکړو بندیز، د افغانانو او نړیوالو تر منځ تریخ برخلیک ته د نجونو او ښځو د تلو اندېښنه را پورته کوي، هغه چې ښځو د طالبانو په لومړي پلا واکمنۍ کې درلود.
