د نجونو د تعلیم په اړه د طالبانو له پرېکړې وروسته متحده ایالاتو پرون اعلان وکړ چې له طالبانو سره د دوحې له خبرو وځي.
په دوحه کې د طالبانو او امریکا د استازو خبرې ځکه مهمې وې چې هدفیې د افغانستان اقتصادي ستونزو ته د یوې حللارې موندل و.
متحده ایالاتو دغه خبرې پرون ناڅاپه لغو کړې. دا پرېکړه د طالبانو د هغه اقدام پر وړاندې غبرګون و چې له شپږم د لوړو ټولګیو زدهکوونکې نجونې یې ښوونځي ته له تلو منع کړې.
د امریکا د بهرنیو چارو وزارت ویاند ند پرایس روېټرز خبري اژانس ته وویل چې د نجونو د زدهکړو په برخه کې د طالبانو پرېکړه ډېره زیاته خواشینوونکې وه او تر هر څه مخکې د افغانستان له خلکو او همداراز له نړیوالې ټولنې سره د دوی له ژمنو په څرګنده شاته کېدل و.
د پرایس په وینا امریکا په دوحه کې د پلان شویو خبرو په ګډون له طالبانو سره یو لړ تعاملونه لغو کړي او ورته په ډاګه کړې یې ده چې د دوی پرېکړې ته د دواړو خواوو په تعاملاتو کې د احتمالي ټاکونکي پړاو په سترګه ګوري.
له دې موضوع درې باخبره سرچینو روېټرز ته ویلي دي چې نن او سبا یکشنبې په دوحه کې د یوه کنفرانس په څنډه کې د طالبانو د ادارې له استازو سره د امریکايي چارواکو څو غونډې پلان شوې وې.
دې سرچینو چې نهیې غوښتل هویتیې افشا شي ځکه د خبرو اجازهیې نهلرله وویل ټاکل شوې وه په ځینو دې غونډو کې د ملګرو ملتونو او نړیوال بانک استازي هم ګډون وکړي.
د سرچینو په وینا تمه وه چې په دې خبرو کې به د افغانستان بانک د خپلواکۍ او د افغانۍ بانکنوټونو د چاپ په اړه هم بحث وشي.
د دوی په وینا همداراز د افغانستان د بیارغونې د صندوق د هغو سلګونه ملیونه ډالرو د ازادولو لپاره چې په نړیوال بانک کې ساتل کېږي د بشري مرستو د تبادلې د اسانتیا د رامنځته کولو په اړه بحثونه هم په پام کې و. دا پیسې په افغانستان کې د زدهکړې د سکتور لپاره ځانګړې شوي.
روېټرز خبري اژانس د یوه ډیپلومات له قوله چې نومیې نهدی اخیستی خبر ورکړی چې هغه الوتکه چې باید د طالبانو د حکومت د بهرنیو چارو د سرپرست وزیر امیر خان متقي په مشرۍ پلاوی یې له کابله قطر ته بیولی وی هم بېرته نهده ستنه شوې.
د دوحې د خبرو لغوه کول لومړنی مثال دی چې د بشري حقونو او په حکومت کې د نورو اړخونو د ګډون په برخه کې د طالبانو له اقداماتو وروسته ښايي له دوی سره د مرستې لپاره د نړیوالې ټولنې پر لېوالتیا مستقیم اغېز وکړي.
دا په داسې حال کې ده چې د طالبانو حکومت د بهرنیو مرستو د ترلاسه کولو او د بانکي زېرمو د ازادولو په چارو کې له سختو ستونزو سره مخامخ دي.
له بلې خوا د افغانستان په بازارونو کې د نقدو پیسو د کمښت له وجې اقتصادي بحران او انفلاسیون اوج ته رسېدلي دي.
