د ترکیې او یونان پولو ته نژدې د هوا د سوړوالي له کبله د ۱۲ پناه غوښتونکو له مړینې وروسته انقره او اتن پر یو بل په دې غمیزې سبب بولي.
ترکیې یوناني پوله ساتي تورن کړي چې له پناه غوښتونکو څخه یې د ژمي په دې سخته یخنۍ کې جامې او بوټونه په زور ایستلي او بیا یې له خپلې پولې شړلي دي.
د ترکیې د کورنیو چارو وزیر سلیمان سویلو یوناني پوله ساتي د دغو ۱۲ پناه غوښتونکو د مړینې مسوول وبلل.
خو د یونان د کډوالو وزیر نوتیس میتاراچي د ۱۲ پناه غوښتونکو د مړینې د تایید په ترڅ کې د ترکیې د کورنیو چارو وزیر څرګندونې رد کړې او هغه یې دروغي تبلیغات وبلل.
ده ادعا وکړه چې پناه غوښتونکي هېڅکله د یونان تر پولې نه وو رسېدلي نو څرنګه کېدای شي چې یوناني پوله ساتو ځورولي وي.
ترکیه او یونان په خپل منځ کې زیاته سیالي لري. د دواړو هېوادونو ژور اختلاف د قبرس پر سر دی.
ترکیې او یونان په وروستیو کلونو کې ته له افغانستان، سوریې او عراقه ډېر شمېر پناه غوښتونکو مخه کړې.
پناه غوښتونکي هڅه کوي چې د دغو هېوادونو له لارې ځان لوېدیځې اروپا ته ورسوي.
په ځلونو په یونان کې له پناه غوښتونکو سره د بد چلند راپورونه خپاره شوي دي.
