د ښاغلي جلال لور حسنا جلال چې خپله دا مهال له افغانستانه دباندې ده، ازادي راډیو ته وویل، د پلار له دوستانو یې یو تن چې سهار ورسره و، ورته ویلي چې پلار یې نیول شوی دی.
حسنا جلال د طالبانو د حکومت له خوا د خپل پلار نیول کېدل وغندل او ویې ویل چې په دا ډول نیونو طالبان نه شي کولی پردې ډلې د انتقادونو غږ خاموشه کړي.
طالبانو تر اوسه په رسمي توګه د ښاغلي جلال د نیول کېدو په اړه څه نه دي ویلي.
خو د طالبانو د حکومت یوې سرچینې چې نه یې غوښتل نوم یې واخیستل شي، ازادي راډیو ته د کابل پوهنتون د دې استاد نیول کېدل تایید کړل او ویې ویل، نوموړی د هغو "تورونو" په خاطر چې د طالبانو د حکومت "پر ځینو مسولینو او ادارو" یې پورې کړي د تحقیق لپاره غوښتل شوی دی.
فیض الله جلال چې ډېر کله یې د رسنیو په سیاسي بحثونو کې د سیاسي شنونکي په توګه ګډون کاوه، په تېر لړم میاشت کې یو خصوصي ټلوېزیون کې د طالبانو د یو ویاند سره په بحث کې لفظي شخړه وکړه او پر طالبانو یې سختې نیوکې وکړې.
د دې بحث ځینې برخو هغه مهال په خواله رسنیو کې ناندریز او تاوده بحثونه راپورته کړي وو.