د کونړ اوسیدونکي او چارواکي وايي، نن یو ځل بیا پاکستانیو ځواکونو د کونړ پر شلتن او سرکاڼو ولسوالیو د توپونو ډزې کړي چې د طالبانو د کلک غبرګون سره مخ شوي او د ډز ځواب يې په ډزو ورکړی دی.
د کونړ پر سرکاڼو او شلتن ولسوالۍ د جمعې ورځې مازدیګر مهال د پاکستان پوځ د توپونو او نورو درنو وسلو ډزې کړي.
د خلکو په وینا چې د توپونو راتوغول شوې ګولۍ د شلتن په سنو، چوګام او د سرکاڼو ولسوالۍ پر ګنجګل او باروګۍ سېمو لګیدلي چې تراوسه يې د ځاني تلفاتو په اړه کوم خبر نشته.
دوي وايي، د پاکستانیو توپچي بریدونو په ځواب کې طالبانو هم له اسمار او سرکاڼو د ډي سي توپونو ډزې کړي او د ډز ځواب یې په ډزو ورکړی.
د کونړ یو تن اوسیدونکی خان محمد وايي: "نن چې د پاکستان له لوري پر شلتن او سرکاڼو د توپونو ډزې وشوې، نو د اسلامي امارت سرتیرو هم پرې له اسمار او سرکاڼو ولسوالیو پر پاکستان د ډي سي توپونو ډزې وکړي. دا زموږ د کونړ د ولسونو غوښتنه وه."
طالب چارواکي هم مني چې د دوی وسله والو د پاکستانيو ځواکونو د توپچي بریدونو ځواب ورکړی، خو د موضوع د حساسوالي له امله د نوم او غږ خپرولو څخه ډډه کوي.
کونړ کې طالبانو پاکستانیو ځواکونو ته په داسې حال کې د ډزو ځواب په ډزو ورکوي چې څو ورځې وړاندې د پاکستان پوځ د ننګرهار لعل پورې ولسوالۍ اړوند پلوڅۍ کې اغزن سیم غځولو، خو طالبانو يې مخه ونیوله او اغزن سیم يې ترې راوړ.
هغه ویډیوګانې چې ټولنیزو رسنیو کې خپرې شوي په کې د ننګرهار ملي امنیت سرپرست رئیس ډاکټر بشیر ښکاري چې پاکستانیو عسکرو ته تُندې خبرې کوې او ورته وايي، نور باید له وړاندې راتګ ډډه وکړئ.
د ننګرهار د اطلاعاتو او کلتور ریاست رسنیو ته په لېږلي خبرپاڼه کې لیکلي چې د طالبانو د دفاع وزارت لوي درستیز قاري فصیح الدین (فاتح) د ننګرهار لوړ پوړو چارواکو سره دغه سېمې ته تللی او هلته يې ویلي چې اسلامي امارت ټولو ګاونډیو سره ښه ګاونډیتوب غواړي، خو که څوک د افغانستان د ځمکې نیولو او دلته د ستونزو پیدا کولو هڅه کوي، نو دوی هم غلي نه شي پاتې کیدای.
د ښاغلي فاتح دغه خبرې د ټولنیزو رسنیو د یو شمېر کارونکو له خوا ستایل شوي دي.
پاکستان تراوسه د نوو توپچي بریدونو، د هغوی له خوا په لعل پوره کې د اغزن سیم غځولو او د طالب چارواکو د غبرګون په اړه څه نه دي ویلي.
له ۲۰۱۰ زیږدېز کال راپه دېخوا د کونړ او د هېواد په یو شمېر سېمو د پاکستان پوځ توپچي بریدونه کوي.
د سېمې اوسیدونکي وايي، په دغو بریدونو کې تراوسه په سلګونو کسانو ته مرګ ژوبله اوښتې او ګڼ يې کډوال کړي دي.
د دوی په خبره چې په ډیرو ځایونو کې پاکستانی پوځ له ډیورنډ کرښې وړاندې راغلي ،اغزن سیمونه يې غځولي او د خلکو د تګ راتګ مخه يې نیولې ده.