د روسیې د بهرنیو چارو وزیر وايي، هېواد یې چمتو دی چې له متحدو ایالاتونو، اروپايي ټولنې او ناټو سره د افغانستان په مساله کې همکاري وکړي.
سرګي لاوروف پرون جمعه د تلې په ۱۶مه د اروپا د کسب او کار د سازمان له یو شمېر غړو سره په کتنه کې وویل، د ناټو غړي باید د افغانستان د بیارغونې په برخه کې خپل مسوولیت ترسره کړي.
لاوروف ټینګار وکړ چې روسیه پر افغانستان د احتمالي حملې لپاره د منځنۍ اسیا هېوادونو ته د پوځي تاسیساتو له استولو او هلته د نوېو پوځي اډو له جوړولو سره مخالفه ده.
د روسیې د بهرنیو چارو وزیر زیاته کړه چې په داسې یوه حالت کې ښايي د منځنۍ اسیا په هېوادونو کې تروریستي حملې وشي.
د افغانستان لپاره د روسیې ځانګړي استازي ضمیر کابلوف د چهارشنبې په ورځ وویل چې هېواد یې د طالبانو استازو ته بلنه ورکړې، څو د افغانستان په اړه په پلان شوېو خبرو کې ګډون وکړي.
په پام کې ده چې دا غونډه د اکتوبر په شلمه په مسکو کې جوړه شي.
