د افغانستان بانک وایي، طالبانو تر ۱۲ میلیونه ډېر ډالر او یوه اندازه سره زر د افغانستان د پخواني حکومت د چارواکو له کورونو ترلاسه کړي دي او دا شتمني یې دغه بانک ته سپارلې ده.
دا خبر په داسې وخت کې خپور شوی دی چې د افغانستان په بانکونو کې ډالر او افغانۍ کمې شوي دي.
د کابل اوسیدونکې ښوونکې حمیدې ازادي راډیو ته وویل: "زه ښوونکې یم دوې میاشتې وشوې چې معاش مو نه دی اخیستی، زه د خپل کور سرپرسته یم، د کور کرایه هم دوې میاشتې پاتې ده، زه له اسلامي امارته غواړم چې زموږ معاشونه حواله کړي."
د دې په څیر د دې ښار یو بل اوسیدونکی مصطفی هم دا هیله لري چې معاش ترلاسه کړي.
نوموړی وايي: "د دولت کارکوونکی یم، تقریباً دوه میاشتې وشوې چې معاش مو نه دی اخیستی، په کور کې ډېرمشکلات دي، د کور کرایه ده، کاروبار نه شته د کور کرایه تقریباً دوه میاشتې وشوې چې پاتې ده."
په افغانستان کې د افغانۍ او ډالرو کمښت له مهمو ګواښونو څخه ګڼل کېږي.
د افغانستان مرکزي بانک پرون اعلان وکړ چې ۱۲ اعشاریه درې میلیونه ډالرچې طالبانو د پخواني حکومت د چارواکو له کورونو موندلي دي، د افغانستان بانک ته ورکړي دي.
هغه کسان چې په بانکونو کې پیسې لري هغوی ته د طالبانو حکومت د اوونۍ تر دوه سوه ډېر ډالر نه ورکوي.
دا پیسې هم هغه وخت خلک ترلاسه کوي چې په اوږدو اوږدو کتارونو کې په ساعتونه انتظار شي.
نړیوال بانک او د پيسو نړیوال صندوق له افغانستان سره خپلې مرستې درولي دي او د امریکا مرکزي بانک شااوخوا نهه میلیارډه او پنځه سوه میلیونه ډالرچې د افغانستان د مرکزي بانک پیسې دي، کنګل کړي دي. نړیوال دې ته انتظاردي چې طالبان خپلې ژمنې عملي کړي چې یوه مهمه ژمنه یې د ښځو حقونه دي.
د راپورونو له مخې د افغانستان تر اتلس میلیونه ډېرکسان له جدي بشري وضعیت سره مخامخ دي.
په دې ترڅ کې ملګروملتونو په خپل اونیز راپور کې خبرداری ورکړی دی چې د افغانستان اووه نوي فیصده خلک به د راتلونکي کال تر نیمایي پورې د خوارۍ تر کرښې لاندې ژوند ته ستانه شي.
د دغو اندېښنو د مخنیوي لپاره د دوشنبې په ورځ په جنیوا کې د ملګرو ملتونو په کوربتوب غونډه وشوه چې په کې نړیوالو له افغانستان سره د یو اعشاریه دوه میلیارډه ډالرو مرستې ژمنې وکړې.
دا مرستې طالبانو ته نه ورکوي په دې پیسو به د خیریه موسسو او بنسټونو له لوري د ژمي په درشل کې له اړمنو افغانانو سره په راتلونکو ورځو کې مرستې وشي.
