د ایران پر اټمي تړون د ویانا په پرونیو (چهارشنبه-د غويي ۲۹مه) خبرو کې د پرمختګ خبر ورکول شوی دی.
دیپلوماتان وایي، ښایې دا تړون بېرته را ژوندی او واشنګټن به احتمالاً بېرته تړون ته راوګرځي.
امریکا په ۲۰۱۸ میلادي کال کې د پخواني ولسمشر ډونالډ ټرمپ د واکمنۍ پر مهال د ایران له اټمي تړونه وتلې او هغه یې نیمګړی بللی وو.
د جرمني د بهرنیو چارو وزیر هایکو ماس وویل چې په ویانا کې د دې تړون د غړو هېوادونو ترمنځ خبرو د پام وړ پرمختګ درلود او هیله یې وښوده چې ډېر ژر به په دې اړه یوه پرېکړه وشي.
هغه وویل چې هدف دا دی د راتلونکو دوو اونیو په خبرو کې یوه نتیجه ترلاسه شي او تړون ته د امریکا د بېرته راتګ لپاره شرایط مساعد شي.
د جرمني د بهرنیو چارو وزیر جزییات ورنه کړل چې په کومو برخو کې پرمختګونه شوي دي؟
د اروپایي ټولنې یوه چارواکي انریک مورا چې په دې خبرو کې یې برخه درلوده وویل، دی ډاډه دی چې په دې اړه به یو توافق ترلاسه شي، ځکه دا مذاکرات د یوې اوونۍ لپاره وځنډول شول.
په دغو خبرو کې د روسیې استازي میخاییل اولیانوف پر خپله ټویټرپاڼه ولیکل چې یو توافق پر لاره دی او هیله یې وښوده چې راتلونکې اوونۍ به د مذاکراتو وروستی پړاو وي.
په دې خبرو کې د امریکا متحده ایالاتو استازی ګډون نه لري، خو یوه امریکایي پلاوي ویانا ته تګ راتګ کاوه.
د ایران د بهرنیو چارو وزارت مرستیال عباس عراقچي د چهارشنبې (د غويي ۲۹مه) د ورځې خبرو په درشل کې ویلي و چې ښه پرمختګونه شوي، خو څو اساسي مسالې لا ډېرې ارزونې ته اړتیا لري.
په ویانا کې د دغو خبرو تمرکز تر ډېره پردې دی چې د امریکا د پخوانۍ ادارې له خوا پر ایران د لګول شوېو بندیزونو د لېرې کولو لپاره یوه حل لاره پیدا شي او ایران وهڅول شي چې بېرته خپلو ژمنو ته راوګرځي.
ایران د ۲۰۱۵ میلادي کال په دې تړون کې چې د نړۍ له شپږو قدرتونو سره یې لاسلیک کړی و، پر تهران د نړیوالو بندیزونو د لېرې کېدو په شرط منلې وه چې خپل اټمي پروګرام محدود کړي.
وروسته له هغه چې د امریکا پخواني ولسمشر له دې تړونه د واشنګټن د وتلو اعلان وکړ، ایران په غبرګون کې په لوړه سطح د یورانیمو بډاینې ته مخه کړه او تر هغه اندازې یې ډېر زېرمه کړل چې په تړون کې موافقه ورباندې شوې وه.
تهران د دې تړون د نورو لاسلیک کوونکو هېوادونو لکه، چین، فرانسې، بریتانیا، روسیې او جرمني وغوښتل چې پر دوی اقتصادي بندیزونه کم کړي.
د دې تړون د لاسلیک هدف دا وو چې ایران اټمي وسله جوړه نه کړي، خو تهران تل ټینګار کړی چې اټمي پروګرام یې د سوله ییزو اهدافو لپاره دی.
د امریکا اوسني ولسمشر جو بایډن ویلي چې غواړي بېرته له دغه تړون سره یوځای شي، خو وایي تهران هم باید بېرته پرخپلو ژمنو عمل وکړي.
