د کابل په ۱۳مه امنیتي حوزه، دشت برچي سیمه کې سید الشهدا ښوونځي ته څېرمه پرونیو (د غويي ۱۸مه) درېیو چاودنو د زیاتو سازمانونو او رهبرانو عکس العملونه پارولي دي.
دغه چاودنې د زده کوونکو د رخصتۍ پر مهال وشوې چې یوه په کې موټربم چاودنه وه. په نتیجه کې یې په لسګونو کسانو ته مرګ ژوبله واوښته.
د کورنیو چارو وزارت ویاند طارق ارین چې دا چاودنې یې لوی تروریستي جنایت بللی ویلي، دغو چاودنو کې وژل شوي او ټپیان ملکیان دي.
د دې پېښې یوه عیني شاهد د کابل پوهنتون استاد علي امید، ازادي راډیو ته وویل: "کله چې پُل سوخته سیمې ته ورسېدم او دشت برچي ته پر لار وم. خصوصي او دوه دولتي روغتونونه ټول له مراجعینو ډک وو. امبولانسونو پرله پسې تګ راتګ کاوه."
محمد حکیم اخلاقي چې خورزه یې په دې چاودنه کې ټپي شوې وايي، زیات زده کوونکي ډارېدلي وو: "د پېښې سیمه کې زده کوونکو چې لا بې سده وې، دغه راز د زده کوونکو د کورنیو ځینو غړو شوک لیدلی دی."
د جمهوري ریاست اعلامیه کې د سید الشهدا په نوم د نجونو ښوونځي ته څېرمه پرونۍ چاودنې د وسله والو طالبانو کار بلل شوی او د ولسمشر محمد اشرف غني په وینا ویل شوي: "طالبانو د نامشروع جګړې او تاوتریخوالي په تشدید سره یو وار بیا وښوده چې د اوسني بحران سوله ییز او اساسي حل ته لېواله نه دي."
د افغانستان د حج او اوقافو وزیر محمد قاسم حلیمي په خپله رسمي فېسبوک پاڼه کې لیکلي: "پر كوچنیو اطفالو او محصلینو انفحار او انتحار لوی جنایت دی عاملین یې د اسلام له دین نه وتلي دي، اسلام له دوی نه بې زاره دی."
د سولې په چارو کې د دولت وزارت په ټویټر کې لیکلي، دا ډول حملې هېڅ ډول دیني مشروعیت نه لري او عاملان به یې په خلکو کې د نورې کرکې له ایجاد پرته بله لاسته راوړنه ونه لري.
د ملي مصالحې عالي شورا رئیس عبدالله عبدالله په یوه اعلامیه کې ویلي، دا ډول تروریستي، بُزدلانه، نه بښل کېدونکي او د نه منلو وړ حملې ظالمانه دي چې کلمات یې د غندلو لپاره کافي نه دي.
د ملي مصالحې عالي شورا ویاند فریدون خوځون ازادي راډیو سره په خبرو کې بیا هم د اوربند د ټینګېدو غوښتنه مطرح کړه.
ښاغلي خوځون زیاته کړه: "موږ له ټولو خواوو خصوصاً له طالبانو غواړو چې د روژې مبارکې میاشتې په خاطر او د اختر مبارکو ورځو په خاطر اوربند اعلان کړي، څو د افغانستان خلک اختر په خوشحالۍ ولمانځي. ټول طرفونه سوله غواړي، خو تر اوسه په عمل کې د سولې د ټینګښت او د جګړې پای ته رسېدو لپاره عملي اقدامات نه دي شوي او نه دي ښوول شوي."
د وسله والو طالبانو ویاند ذبیح الله مجاهد چې پرونۍ حمله یې غندلې، د هغو کسانو کار یې بللی چې د ده په وینا: "د کابل ادارې تر وزرو او استخباراتي پوښښ لاندې د داعش په نوم فعاليت کوي."
په افغانستان کې د ملګرو ملتونو مرستندوی ماموریت یا یوناما د کابل دشت برچي سیمه کې پرونۍ چاودنې بې رحمانه عمل بللی دی.
په افغانستان کې د اروپايي ټولنې استازولۍ هم دا حمله وحشیانه او د ټرورېزم یو کرکپاروونکی عمل بللی دی.
دغه دفتر په یوه ټویټ کې ویلي، د نجونو د یوه ښوونځي په نښه کول، په واقعیت کې د افغانستان پر راتلونکې حمله ده.
په افغانستان کې د ناټو ملکي استازي سټیفانو پونتيکوروو دا د افغانانو په وړاندې بُزدلانه او د کرکې وړ حمله بللې ده.
په کابل کې د بریتانیا سفارت په یوه ټویټ کې دا حمله غندلې او لیکلي یې دي: مخکې تر دې چې نور بې ګناه ماشومان ووژل شي، ژر تر ژره دې دا تاوتریخوالی پای ته ورسول شي.
د بشري حقونو خپلواک کمېسیون او د امریکا سفارت هم دا پېښه غندلې ده.
په خېبرپښتونخوا کې پېژندل شوي سیاستوال او د بشري حقونو فعال افراسیاب خټک په ټویټر کې لیکلي: په افغانستان کې پر ماشومانو تروریستي حملې له شماره وتلي دي.
هغه لیکلي، داسې ښکاري چې د افغانانو ژوند فرضي متحدانو، ملګرو ملتونو ان اسلامي دولتونو ته کوم اهمیت نه لري.
د کابل په لوېدیځ دشت برچي سیمه کې تردې مخکې د ځینو خونړیو حملو مسوولیت د اسلامي دولت ډلې یا داعش منلی دی.