د لوګر ولایت د وړمې شپې د خونړۍ پېښې د قربانیانو د ځینو کورنیو غړي، د خپلو عزیزانو د امنیت په ساتنه کې امنیتي بنسټونه پړه بولي.
د جمعې په شپه د لوګر په مرکز پل علم ښار کې په موټر بم چاودنه کې ۲۶ تنه ووژل شول او ۱۱۰ نور ټپیان شول.
محمد صابر چې د لوګر ولایت په خونړي موټر بم برید کې یې د کورنۍ غړي وژل شوي وايي "موږ په کومه ګناه وژل کېږو."
نوموړی زیاتوي، په یاده پېښه کې یې درې د تره زامن او یو خوریې ځوانیمرګان شول.
محمد صابر وايي چې وژل شوي خپلوانیې د کانکور په ازموینه کې د ګډون لپاره پل علم ښار ته راغلي وو، خو له ټولو ارمانونو سره تر خاورو لاندې شول.
دی وايي: "څلور مې نږدې خپلوان و، درې د تره زامن او یو خوریې چې ټول شهیدان شول، دوی د کانکور لپاره راغلي وو، خو له بده مرغه ووژل شول، دوو د ترو زامنو مې ودونه کړي وو، د کورنۍ د ګټې وټې خلک وو."
محمد صابر په امنیتي بنسټونو نیوکه کوي چې ولې د پېښې په مخنیوي کې پاتې راغلي او د برید مخهیې نهده نیولې.
محمد یار د لوګر ولایت بل اوسېدونکی دی چې په یاده پېښه کې یې څلور خپلوان وژل شوي دي.
محمد یار زیاتوي، دوه د تره زامن یې چې د دولت کارکوونکي و او د څو میاشتو تنخواګانې یې نهوې اخیستې، د خپلو تنخواګانو د اخیستو لپاره پل علم ښار ته راغلي وو.
محمد یار وویل: "له حکومت غواړو چې د لوګر امنیت ټینګ کړي، تر څه وخت به موږ شهیدان او ټپيان ورکړو، د لوګر له چارواکو غواړو چې دې برخې ته پام وکړي."
د لوګر د پېښې نږدې ټول قربانیان د ازرې ولسوالۍ اوسېدونکي دي، دغه ولسوالۍ د لوګر ولایت له لیرې پرتو او غرنیو ولسوالیو او له څو کلونو راهیسې د طالبانو په محاصره کې ده.
له دې خونړۍ پېښې وروسته د لوګر والي عبدالقیوم رحیمي په امنیتي ناسته کې د لوګر خلکو ته د امنیت ډاډ ورکړ او ویېویل چې امنیتي وضعیت به ښه شي.
په لوګر کې د وړمې شپې پېښه په ملي او نړیواله کچه وغندل شوه.
که څه هم د دې پېښې مسؤلیت چا نهدی منلی، خو د افغانستان د کورنیو چارو وزارت د دغې پېښې پړه پر طالبانو واچوله.
