افغانستان نن سې شنبه (د کب ۵مه) وتوانېد د کرونا ویروس ضد واکسين د تطبیق یا ورکړې لړۍ پیل کړي.
پوره کال وړاندې په دې هېواد د کوېډ-۱۹ ناروغۍ لومړۍ پېښه ثبت شوه.
دا واکسین د هند لهخوا افغانستان ته وړیا ورکړل شوی او ټول ۵۰۰ زره ډوزه دي چې په لومړي پړاو کې به ۲۵۰ زره کسانو ته پیچکاري شي.
د دې بهیر د پیل په مراسمو کې ولسمشر غني وویل، کرونا وبا نړۍ ولړزوله، خو افغانستان وتوانېد په ډېر ښه ډول یې مدیریت کړي.
جمهور رئیس غني زیاته کړه، افغانستان توانېدلی چې د کرونا وبا له اقتصادي او ټولنیز زیان تر ډېره ځان وساتي.
که څه هم جمهور رئیس په عادلانه ډول د هند لهخوا د مرسته شوېو واکسینو د تطبیق غوښتنه کوي، خو ژمنه یې دا ده چې په دوهم پړاو کې به نږدې د ټول هېواد ۴۰ سلنه خلکو ته د کرونا وبا ضد واکسین د تطبیق زمینه برابره شي.
ښاغلي غني زیاته کړه: "په دې پړاو کې د افغانستان له ټولو خلکو زما غوښتنه دا ده چې د واکسین د عادلانه وېش لپاره د عامې روغتیا وزارت د وړاندیز له مخې، له دوی سره همکاري وکړي. زموږ هڅې په دوهم پړاو کې د سرچینو د چمتو کولو لپاره دي چې څلوېښت تر پنځه څلوېښت سلنه خلک به را ونغاړي، انشاالله یوه پایله به ورکړي."
افغان جمهور رئیس له هند څخه هم مننه وکړه چې د یوه سټراټیژیک ملګري په توګه یې تل په بشري برخه کې د افغانستان سره مرسته او همکاري کړې ده.
په ورته وخت کې د افغانستان د عامې روغتیا وزارت وايي، په لومړي پړاو کې به دا واکسین امنیتي او دفاعي ځواکونو، روغتیايي پرسونل او د رسنیو کار کوونکو ته پیچکاري شي.
د دې وزارت سرپرست وحید مجروح وايي، افغانستان له هغو محدودو هېوادونو څخه دی چې د کرونا ضد واکسین د ورکړې بهیر پیلوي.
ښاغلي مجروح زیاته کړه: "افغانستان چې د هغو محدودو هېوادونو له ډلې دی چې له دې سره-سره چې په نړۍ کې پر واکسین له وسلې او خوړو سیالي زیاته ده، د افغانستان د روغتیا سکټور، نن د جمهوري ریاست تر مشرتابه لاندې د دې ویاړ لري چې خپلو وطنوالو ته د کرونا ضد واکسینو د تطبیق لړۍ پیلوي."
د افغانستان د عامې روغتیا وزارت سرپرست ډاډ ورکوي چې د کرونا ضد واکسین وېش به تر جدي څار لاندې ونیسي.
په ورته وخت کې په افغانستان کې د هند سفیر ردریندرا تندن افغانانو ته ډاډ ورکوي چې هېواد به یې د کرونا سره د مبارزې برخه کې دوی یوازې پرې نه ږدي.
د هند د سفیر له قوله، د هند لهخوا دکرونا ویروس ضد واکسین د روغتیا نړیوال سازمان یا 'ډبلیو.اېچ.او' منلي او هېواد یې په نړۍ کې د دې واکسینو تر ټولو لوی تولیدونکی دی.
په افغانستان کې د کرونا ویروس ضد واکسین د ورکړې لړۍ داسې مهال پیلېږي چې همدا اوس په دې ناروغۍ له ۵۵ زرو زیات کسان اخته شوي چې له دې شمېر ۲۴۰۰ کسان مړه شوي دي.
په مشهورو مړو شوېو کې یو شمېر چارواکي، خبریالان او نور فعالان هم شامل دي چې له ډلې یې په اقتصادي او سوداګریزو او د بېوزلۍ په راکمولو کې د جمهور رئیس ځانګړې استازی محمد یوسف غضنفر، د ننګرهار پخوانی والي سلیم کندوزی او مشهور لیکوال رهنورد زریاب یادولای شو.
خو خبریاله انیسه شهید لومړۍ مېرمن ده چې په افغانستان کې یې په رسمي ډول د هند لهخوا مرسته شوي کرونا ضد واکسین پیچکاري کړل.
