د افغانستان د جمهور رئیس لومړی مرستيال وايي، د امریکا له دفاع وزیر سره د ولسمشر محمد اشرف غني د بېګاه شپې په خبرو کې له امریکايي لوري سره د طالبانو د دوحې په هوکړه کې د شته تشو په اړه هم خبرې وشوې.
امرالله صالح په خپله فېسبوک پاڼه کې ليکلي دا خبرې هم ورسره وشوې چې د امریکا او طالبانو ترمنځ په هوکړه کې د نورو کميو تر څنګ په دغه توافق کې یو سنجول شوی مېکانیزم نشته.
نوموړي ليکلي، د افغان لوري له خوا په خبرو کې دا خبره هم شامله وه چې له بده مرغه د طالبانو په شفاهي ژمنو باور شوی او طالبانو په خپلې یوې ژمنې هم عمل نه دی کړی.
ښاغلي صالح ليکلي چې دغو خبرو کې له طالبانو د پاکستان د ملاتړ په اړه په اړه هم وويل شول چې هوکړه کې ورته هېڅ اشاره نه ده شوی او په خبره يې تر کومه چې دا ستونزه هواره نه شي د سولې کلي هم تر لاسه نه شي.
د ولسمشر د لومړي مرستيال په وينا، "د افغانستان او امریکا ترمنځ اړیکې بنسټیزې او اساسي ګڼو او وروسته له هغې چې د بایډن اداره رامنځته شوی په اړیکو کې مثبت او د لمس وړ بدلون راغلی."
امرالله صالح زیاته کړې، اوس واشنګټن زیات څه اوري او ليکلي، د افغانستان د مطالعې ډلې راپور خپرول یو بل نېک او د ستایلو وړ اقدام دی، په دغه راپور کې افغانستان او امریکا د سیاسي او امنيتي ګټو ته په درناوي د امریکا د دوو عمده ګوندونو نظرونه راخېستل شوي.
د افغانستان جمهوري ریاست هم په يوه اعلاميه کې ويلي چې بېګاه شپه ولسمشر محمد اشرف غني د امریکا له دفاع وزیر لوېډ اسټن سره ټیلیفوني خبرې کړې.
د افغانستان د دفاع وزیر مرستیال شاه محمد میاخېل بپا د دواړو لورو د خبرو په اړه ازادي راډيو ته وویل: "د امریکا د دفاع د وزیر او د ولسمشر محمد اشرف غني ترمنځ په خبرو کې دوه درې ټکي زیات مهم دي لومړی دا چې د امریکا متحده ایالاتو او ناټو د افغانستان له امنیتي او دفاعي ځواکونو ملاتړ وښود او په ورته وخت کې باید د سولې په خبرو کې پرمختګ راشي او دغه شان باید تاوتریخوالی کم شي"
په ورته وخت کې د امریکا دفاع وزیر لوېډ اسټن له افغانستان سره د مشارکت او غښتلو دفاعي اړیکو ډاډ ورکړی.
د متحده ایالاتو د دفاع وزیر لوېډ اسټن دا خبره له افغان ولسمشر اشرف غني سره تر خبرو وروسته په خپل ټوېټر لیکلې ده.
هغه ویلي، له افغان ولسمشر سره د افغان سولې د پروسې د چټک پرمختګ د اهمیت او د افغانستان او امریکا په ګډ قوي مشارکت وغږېد.
د ښاغلي اسټن په حواله په خبري بیان کې هم د امریکا د تعهد او د دفاعي اړیکو ډاډ ښودل شوی.
ازادي راډیو هڅه وکړه چې د امرالله صالح د ليکنې په اړه د طالبانو نظر هم ولري، خو تر اوسه نه ده بریالۍ شوې.
له دې مخکې طالبانو ویلي و چې دوی د دوحې هوکړې عملي کېدو ته ژمن دي، خو تازه دا چې په قطر کې د طالبانو د سیاسي دفتر ویاند محمد نعیم وردګ په خپله ټویټر لیکلي چې د ملا برادر په مشرۍ د طالبانو یو پلاوی ترکمنستان ته تللی.
