د پاکستان په بندري ښار کراچۍ کې په یوه زوروره چاودنه کې لږترلږه ۵ تنه وژل شوي او ګڼ نور ژوبل دي.
دا چاودنه نن سهار د کراچۍ د ګلشن اقبال د هستوګنې مېنې په یوه ودانۍ کې وشوه.
ګلشن اقبال د کراچۍ، چې د پاکستان تر ټولو ستر تجارتي ښار دی، یوه سوداګري مېنه ده.
پولیسو سیمه سمدلاسه کلابنده کړه او تر دې دمه د چاودنې د څرنګوالي په اړه څه نه دي ویل شوي.
خو ګومان کېږي چې د مرګ ژوبلو شمېر ډېر وي.
ویل کېږي چې یو شمېر کسان کېدای شي د دې څو پوړیزې ودانۍ تر کنډوالو لاندې بند پاتې وي.
د پېښې د ځای تصویرونه ښيي چې د ودانۍ لاندینۍ برخه ډېره زیانمن شوې ده.
ګومان کېږي چې بم د ودانۍ په دوهم پوړ کې چاودلی دی.
د پېښې شاهدان وايي چې د شاوخوا ودانیو او کورونو د کړکیو ښیښې ماتې شوي او یو شمېر موټرونه، چې د ودانۍ په شاوخوا کې ولاړ ول، ویجاړ شوي دي.
د ایدهي خیره موسسه وايي، چې دوی د پېښې له ځایه ۱۵ ټپیان روغتون ته وړي دي.
په تېرو کلونو کې په کراچۍ کې ډېرې قومي او فرقوي نښتې شوي دي.
د پاکستان د پوځ لوی درستیز جنرال قمر جاوېد باجوه د دې پېښې د فوري تحقیقاتو غوښتنه وکړه.
ده د کراچۍ د قول اردو قوماندان ته ویلي چې پلټنه وکړي او معلومات له پوځ سره ژر تر ژره شریک کړي.
د پاکستان د پیپلز ګوند مشر بلاول بوټو هم د دې پېښې د څرنګوالي او د عواملو د معلومولو لپاره د تحقیقاتو غوښتنه کړې ده.
پیپلز ګوند په نسبي ډول په کراچۍ کې زیات نفوذ لري.
