د جاپان د سولې طبي موسسې د مشر ډاکټر تتسو ناکامورا د وژل کېدو په اړه د غبرګونونو پر دوام، د همبستګۍ ګوند کابل کي د پاکستان سفارت مخي ته لاریون وکړ.
لاریون کوونکو د پاکستان استخباراتي اداره یا ایایسای د جاپاني خیریه مرستندوی ډاکټر تتسو ناکامورا او د هغې د پنځه همکارانو د وژنې په قضیه کې ښکېله وبلله.
دوی وايي، ناکامورا د کونړ سیند اوبه چې پاکستان ته تلې مهارولې او همدا ډول یې د افغانستان کې د کرنې د پراختیا لپاره کار کاوه.
د افغانستان د همبستګۍ ګوند غړې زرمینه:
"د ډاکټر ناکامورا او د هغې د همکارانو د وژل کېدو عاملین د پاکستان استخباراتي اداره ایایسای ده چې د خپلو کورنیو نوکرانو په وسیله زموږ په هېواد کې خپلو ترهګریزو اعمالو ته دوام ورکوي. د پاکستان حکومت هغه ډول چې کلونه کېږي د کونړ خاوره په توغندو ولي، همدا ډول هغه هغه څوک چې په ختیځ کې د اوبو د مهار په برخه کې جدي کار کوي، خپل دښمن بولي او پرې برید کوي. "
لاریون کوونکي ادعا کوي چې د ناکامورا د وژل کېدو طرحه طالبانو عملي کړې ده.
د ولسي جرګې غړې بلقیس روشن چې په دې لاریون کې یې ګډون کړی وايي، د افغانستان حکومت باید د دې پر ځای چې ډاکټر ناکامورا ته نمایشي افتخاري تابعیت ورکړي، د هغې امنیت ساتلای وای.
اغلې روشن وویل: "د دې پرځای چې هغه ته یې سمبولیک تابعیت ورکړ، باید د هغه امنیت یې ساتلای وای. د پاکستان حکومت د دې قتل تر شاه لاس لري. ناکامورا په افغانستان کې د پاکستان د نوکرانو چې طالبان او داعش دي، و وژل شو. "
موږ په دې په کابل کې د پاکستان سفارت سره اړیکه ونیوه، خو د سفارت کارکوونکو په دې اړه له څه ویلو ډډه وکړه.
ډاکټر ناکامورا د چهارشنبې په ورځ په جلال اباد ښار کې د یوه برید پر مهال لومړی ټپي شو، خو وروسته یې د سختو ټپونو له کبله ساه ورکړه.
تر اوسه هیڅ یوې ډلې د دې برید مسوولیت نه دی منلی او طالبانو بیا ویلي، پر ناکامورا برید د دوی کار نه دی.
په کابل کې داسې مهال د پاکستان حکومت د ناکامورا د وژلو په قضیه کې ښکېل ګڼل کېږي چې تېره ورځ د ننګرهار والي شاه محمود میاخېل وویل، د ناکامورا د وژنې قضیه له افغانستان د باندې پلان شوې وه، خو هغه د کوم هېواد نوم وا نه خیست.
د ناکامورا وژل کېدو په کور دننه او بهر پراخ غبرګونونه راپورته کړي دي.
په تازه ډول د کام ایر هوايي شرکت پر خپلې یوې ایر بس ۳۴۰ ډوله الوتکې د ناکامورا عکس را ځړولی.
د دې شرکت سوداګریز مشر سلیمان عمر ازادي راډیو ته وویل، دا کار یې د دې جاپاني خیریه مرستندوی د خدمتونو له مخې کړی دی.
عمر زیاتوي، که جاپان وغواړي کام اییر چمتو دی چې د ښاغلي ناکامورا جسد خپل هېواد ته ولېږدوي.
له دې وړاندې بیا له ننګرهار سربېره، په کابل، بامیان، خوست او ځینو نورو ولایتونو خلکو کې د ښاغلي ناکامورا په یاد شمعې بلې کړي دي.
۷۳ کلن ډاکټر تتسو ناکامورا په افغانستان کې د جاپان د سولې طبي موسسې مشري کوله او له نږدې شل کلونو راهیسې دلته په خدمت بوخت و.
د جاپان د سولې طبي موسسې په افغانستان په طبي برخه کې کار کړی او تر خوا یې د هېواد په ختیځ کې د کرنې د پراختیا لپاره هم پراخې هلې ځلې کړي.
د ډاکټر ناکامورا د ښو خدمتونو له کبله د افغانستان حکومت هغه افتخاري تابعیت هم ورکړی و.
