د ولسي جرګې د شنبې ورځې (قوس دویمه) په ازاد بحث کې ځینو وکیلانو د ټاکنو له کمېسیون څخه وغوښتل چې د تېرو ولسمشریزو ټاکنو پایلې ژر اعلان کړي، خو شمېر نورو بیا د پروسې پر شفافیت ټینګار کاوه.
د دغې جرګې لومړی مرستیال امیرخان یار چې نن یې د جرګې د غونډې مشري کوله وویل، د رأیو د پایلو بیا بیا ځنډ به د هېواد سیاسي او اقتصادي وضعیت نور هم کړکېچن کړي.
ښاغلي یار زیاته کړه: "د انتخاباتو خپلواک کمېسیون دې ژر د انتخاباتو پایلې اعلان کړي، هر څوک چې د انتخاباتو کمېسیون بریالی اعلان کړي، باید ټول سیاستوال یې قبول کړي."
خو ځینو نورو وکیلانو بیا د ټاکنو پروسې پر روڼوالي ټینګار کاوه او ویل یې چې پایلې باید د پاکو رأیو پر اساس اعلان شي.
تراوسه په ۲۳ ولایتونو کې د رأیو د تفتیش او بیا شمېرنې پروسه بشپړه شوې او په هلمند، کابل، کندهار او ننګرهار کې روانه ده چې ممکن د نن ورځې تر پایه به له دې ډلې په دوو ولایتونو کې کې دغه بهیر بشپړ شي.
د دې لپاره چې دغه کمېسیون د تېرو ولسمشریزو انتخاباتو لومړنۍ پایلې اعلان کړي، باید په ټولو ۳۴ ولایتونو کې د هغو محلونو د رأیو بیاشمېرنه او تفتیش بشپړ کړي چې تقلبي رأیې په کې کارېدلي دي.
خو په اوو ولایتونو پنجشیر، فاریاب، جوزجان، سرپل، بغلان، تخار او بدخشان کې معترضو کاندیدانو د ټاکنو ولایتي دفترونو دروازې تړلې دي.
د عبدالله عبدالله په مشرۍ د ثبات او همپالنې ډله وايي تر بیاشمېرنې وړاندې، باید "پاکې او ناپاکې رأیې" سره بېلې کړای شي، د هر محل د معتبرو رأیو شمېر معلوم او تقلبي رأیې باطلې شي. دغه ډله ۳۰۰ زره رأیې په شرایطو برابرې نه بولي او د باطلېدو غوښتنه یې لري.
د ټاکنو کمېسیون ویاند ذبیح سادات ازادي راډیو ته وویل، دوی په دغو ولایتونو کې د رأیو بیا شمېرنې پیلېدو لپاره له انتخاباتي ټیمونو سره په خبرو بوخت دي.
ښاغلي سادات وویل: "د انتخاباتو خپلواک کمېسیون رهبري همدا اوس د اړوندو انتخاباتي ټیمونو له استازو سره او دغه شان په اړوندو ولایتونیو کې د دوی له مسئولینو سره په خبرو بوخته ده، تر څو وتوانیږو دوی ته قناعت ورکړو، د بیا شمېرنې پروسه پيل شي، او د رأیو پایلې اعلان کړو."
د انتخاباتو خپلواک کمېسیون د جمهوري ریاست د انتخاباتو د پایلو اعلان دوه نېټې نقض کړي او تېره اوونۍ یې ازادي راډیو ته ویلي وه چې راروانه اوونۍ کې به لومړنۍ پایلې اعلان کړي.
تراوسه د ولسمشرۍ ټاکنو د لومړنیو پایلو اعلان دوه ځلې ځنډېدلی او لا هم په دې پورې تړلې چې د رأیو بیاشمېرنه او تفتیش بشپړ شي، هغه بهیر چې څرګنده نه ده څومره نور وخت به ونیسي.
