ټاکل شوې چې د افغانستان د سولې لپاره د امریکا د بهرنیو چارو وزارت ځانګړی استازی زلمی خلیلزاد نن کابل ته راشي.
ښاغلی خلیلزاد به په قطر کې له طالب پلاوي سره د وروستیو خبرو جزئیات نن د افغانستان له حکومتي چارواکو سره شریک کړي.
ښاغلي خلیلزاد پر خپله ټویټرپاڼه تائید کړې چې نن یکشنبه (د وږي ۱۰مه) کابل ته راځي.
د افغانستان د جمهوري ریاست ویاند صدیق صدیقي وايي چې ښاغلی خلیلزاد به له طالبانو سره د شویو مذاکراتو پایلې له ولسمشر محمد اشرف غني او یو شمېر نورو چارواکو سره شریکې کړي.
ده وویل: ټاکل شوې چې ښاغلی خلیلزاد نن کابل ته راشي او طبعا له افغان ولسمشر سره به ملاقات وکړي او د خپلو خبرو نتایج به د افغانستان حکومت سره شریک کړي.
خو ښاغلي صدیقي په دې اړه ډېر جزئیات ورنه کړل.
د افغانستان د سولې لپاره د امریکا متحده ایالاتو د ځانګړي استازي او طالب پلاوي ترمنځ له لسو ورځو خبرو وروسته، نهم پړاو مذاکرات پای ته ورسېدل.
دواړو خواوو تائید کړې چې د موافقې متن وروستی شوی او په ځینو تخنیکي مسایلو اوس هم بحث روان دی.
په قطر کې د طالبانو د سیاسي دفتر ویاند سهیل شاهین پر خپلې ټویټرپاڼې لیکلي چې د خبرو اوسنی پړاو پای ته رسېدلی، خو نن یکشنبه به دواړه لوري پر تخنیکي موضوعاتو بحث وروستی او بشپړ کړي.
نوموړي ډاډ ورکړ چې د افغانستان کشالې د سوله ییز حل په درشل کې دي.
په ورته وخت کې د افغانستان د سولې عالي شورا مرستیال عزیزالله دین محمد وايي چې نهم پړاو خبرې پای ته رسېدلې او لازمه ده چې جزئیات یې د افغانستان د حکومت له رهبرانو او سیاستوالو سره شریک شي.
نوموړي زیاته کړه: زه یقین لرم چې مذاکرات وروستي شوي او پر هغو مسایلو چې بحث پرې شوی، جزییات به یې هم د حکومت له رهبرانو او سیاستوالو سره شریک شي.
طالبانو تر دې وړاندې ویلي و چې له امریکا سره له موافقې وروسته به، له ټولو افغان سیاسي اړخونو سره مذاکرات پیلوي او خبرې به یې د افغانستان لپاره برخلیک ټاکنونکې وي.
د افغانستان حکومت هم تائیده کړې چې مذاکره کوونکی پلاوی چمتو شوی او منتظر دی، چې ژر بین الافغاني خبرې پیل شي ترڅو په افغانستان کې دایمي اوربند او د جګړې ختمېدو ته لاره هواره شي.
