یو لوړ پوړی افغان امنیتي چارواکی وايي، په وروستیو کې یې په ټول افغانستان کې پر وسلهوالو درانه ګوزارونه کړي او دوی یې ځپلي دي.
دا خبره د افغانستان د کورنیو چارو وزارت مرستیال جنرال خوشال سعادت د سې شنبې په ماښام هلمند کې خبریالانو ته وکړه.
د خوشال سعادت په شمول یو لوړ پوړی امنیتي پلاوی پرون سې شنبه ناوخته د هلمند مرکز لښکرګاه ته تللی و چې پهکې په افغانستان کې د ناټو عمومي قوماندان جنرال سکاټ مېلر، د افغانستان د دفاع وزارت او د ملي امنیت شورا مرستیالان هم شامل وو.
د کورنیو چارو د وزارت مرستیال خوشال سعادت لښکرګاه کې رسنیو ته وویل، هلمند ته یې د سفر هدف د افغان ځواکونو د وړتیاوو او هغو عملیاتو د مؤثریت ارزول دي چې په وروستیو کې د هلمند په شمول ټول افغانستان کې شوي.
دی وايي: "پهدې وروستیو کې موږ ډېر تعرضي عملیات کړي، په هلمند او ټول افغانستان کې مو دښمن ته درانه ګوزارونه ورکړي، ومو غوښتل چې خپله د هلمند له امنیه قوماندان، ملي امنیت رئیس، والي صاحب او د قُل اردو له قوماندان څخه واورو چې د دښمن وضعیت څنګه دی او زموږ څنګه دی؟"
په هلمند کې د ازادي راډیو خبریال وايي، د حکومت او بهرنیو ځواکونو دې لوړپوړو چارواکو د هلمند له ځايي چارواکو سره د نویو تجهیزاتو د ورکړې ترڅنګ د افغان ځواکونو د تشکیل د پراختیا او په یو شمېر مرکزي ولسوالیو کې د عملیاتو ژمنې وکړې.
د کورنیو چارو د وزارت مرستیال وسلهوالو ته د درنو ګوزارونو خبره په داسې حال کې کوي چې د ملګرو ملتونو امنیت شورا نن سې شنبې د افغانستان په اړه د دې سازمان د عمومي منشي اننونیو ګوترش پر راپور بحث کوي.
بشپړ راپور یې د محمد الیاس داعي په راپور کې چې د لاندې لېنک په کېکاږلو سره یې اورېدلی شئ:
