د افغانستان د عامې روغتیا وزارت ویاند وحیدالله مایار ازادي راډیو ته وايي چې د کابل ښار د شهر نو سیمې له چاودنې ۹ ټپیان روغتونونو ته لېږدول شوي دي.
ښاغلي مایار د دغو ټپيانو د هویت په اړه معلومات ورنه کړل.
وسلهوالو طالبانو د دغې حملې مسؤلیت منلی دی.
د اېمرجنسي روغتون د ټپیانو د راجستر کولو د برخې یوه مسؤل د ازادي راډیو خبریال ته وايي چې د کابل ښار د شهرنو سیمې له پېښې ۱۴ ټپیان دغه روغتون ته لېږدول شوي دي.
د کورنیو چارو وزارت وايي چې امنیتي ځواکونو د کاونټر پارټ مؤسسې لومړی پوړ تصفیه کړی او د دغې مؤسسې ۱۵۰ تنه کارکوونکي یې ژغورلي دي.
د دغه وزارت په وینا، د نورو کارکوونکو د ژغورلو لپاره تصفیوي عملیات روان دي.
د افغانستان د کورنیو چارو وزارت ویاند نصرت رحیمي ازادي راډیو ته وايي، له چاودېدونکو توکو ډک یو موټر چې د کابل ښار شهرنو کې د پېښې په سیمه کې له حمله کوونکو پاتې شوی، د تخنیکي ټیم لهخوا به چاودنه ورکړل شي.