د امریکا انټرنټي کمپنیو د ناسمو معلوماتو د خپرېدو د مخنیوي لپاره لسګونه زره کسان د میلیونونو ډالرو په لګښت ګمارلي دي.
دغه معلومات اکثر روسي او نورو عاملانو ته منسوبېږي.
د امریکا سنا مجلس هم روانه اوونۍ پهدې هکله دوه راپورونه خپاره کړل.
د ټولنیزو رسنیو شبکو کمپنۍ زیار کاږي چې د هغو انټرنټي ښکاریانو مخه ونیسي چې د تقلبي اکاونټونو او باټونو «روبوټونو» په وسیله هڅه کوي د امریکا په انتخاباتو اغېز وکړي او پهدغه هېواد او نورو ځایونو کې اختلافاتو ته لمن ووهي.
د اسوشیټېډ پرس خبري اژانس راپور وايي چې روانه اوونۍ د امریکا د سنا د استخباراتو کمېټې دوه راپورونه خپاره کړل او په هغو کې داسې پیاوړي دلایل وړاندې شول چې څرګندوي چې مسکو د ناسمو معلوماتو د خپرولو لپاره داسې یو پراخ انلاین کمپاین لري چې پخوا یې تصور نهوو شوی.
پهدغه کمپاین کې د امریکایانو ترمنځ د نژادي، دیني او فکري اختلافاتو رامنځته کولو او پر دولتي ادارو د خلکو د باور د کمولو هڅه کېږي.
راپور زیاتوي چې دا هم څرګنده ده چې پهدغه کمپاین کی لاس لرونکي له یو بله زدهکړې کوي او د هغو اقداماتو په وړاندې چې د دوی خلاف ترسره کېږي ژر ځان عیاروي.
اسوشیټېډ پرس خبري اژانس وايي، په تېرو دوو کلونو کې د امریکا د انتخاباتو په هکله د روسیې او ایراني عاملانو تمرکز پر لویو ټولنیزو شبکو خصوصاً پر فېسبوک وو.
دوی د تقلبي اکاونټونو له لارې ناسم معلومات او داسې پیغامونه چې اختلافاتو ته لمن وهي خپاره کړي دي.
راپورونه څرګندوي چې روسي عاملانو د ټولنیزو شبکو تر څنګ نورو وسایلو لکه انسټاګرام او حتی د موزیک او موبایل اپلېکېشنونو څخه هم کار اخیستی دی.
دوی په فېسبوک کې د ناسمو خبرونو او مطالبو او داسې شعارونو لینکونه خپاره کړي دي چې د مهاجرینو او پخوانیو اوسېدونکو او محافظهکارانو او لېبرالانو ترمنځ اختلافات راپاروي.
امریکایي لویې انټرنتي کمپنۍ لکه فېسبوک، ګوګل او ټویټر چې د ۲۰۱۶ میلادي کال په انتخاباتو کې د مسکو لاسوهنې غافلګیره کړي، د ناسمو خبرونو او له نفرته ډکو تبلیغاتو د مخنیوي لپاره خپل اوچت تخنیک او لسګونه زره کسان د میلیونونو ډالرو په لګښت ګمارلي دي.
دوی د مصنوعي استخباراتو په وسیله تقلبي اکاونټونه او باټونه «روبوټونه» پېژني او لیرې کوي.