کابل چاپ ورځپاڼو د مسکو غونډې په اړه د افغان حکومت پر پرېکړې بحثونه کړي

د کابل چاپ ورځپاڼو په خپلو نننیو ګڼو کې تر ډېره د افغان سولې په تړاو د مسکو په غونډه کې د نه‌ګډون په اړه د افغان حکومت پر پرېکړې بحثونه کړي دي.

• دنیا

دنیا ورځپاڼې په خپل لومړي مخ کې د افغانستان د بهرنیو چارو وزارت په حواله لیکلي دي چې د افغان سولې په تړاو د مسکو په غونډه کې افغان حکومت نه، بلکې د سولې عالي شورا یو پلاوی ګډون کوي.

ورځپاڼې وړاندې لیکلي دي چې د مسکو د غونډې په اړه د اجرائیه ریاست نظر بیا توپیر لري او دا ځکه چې د اجرائیه ریاست ویاند هیله څرګندوي چې د مسکو غونډه به له ښو لاسته راوړنو سره مل وي.

ورځپاڼې لیکلي دي چې د اجرائیه ریاست د ویاند مرستیال امید میثم وایي چې د سولې عالي شورا به په لویه کې د افغان دولت په استازیتوب د مسکو په غونډه کې برخه واخلي.

• ویسا

ویسا ورځپاڼې بیا لیکلي دي چې د افغانستان د بهرنیو چارو وزارت د دې تر څنګ چې د مسکو په غونډه کې د افغان حکومت ګډون ردوي، وايي چې د سولې عالي شورا د یو خپلواک بنسټ په توګه پرېکړه کړې چې په غونډه کې ګډون وکړي.

خو ورځپاڼې وړاندې د سولې د عالي شورا د ویاند سید احسان طاهري په حواله لیکلي دي چې د سولې د عالي شورا پلاوی به د افغان حکومت په استازیتوب د مسکو په غونډه کې برخه واخلي.

ورځپاڼه لیکي:

د سولې عالي شورا به یو څلور کسیز او یا هم شپږ کسیز پلاوی د مسکو غونډې ته واستوي او د پلاوي غړي به نن اعلان شي.

• ملي ارمان

ملي ارمان ورځپاڼې بیا د مسکو په غونډه کې د نه‌ګډون په اړه د افغان حکومت پر پرېکړې د خپل بحث په دوام لیکلي دي چې دا هغه پرېکړه ده چې هېڅ یو خپلواک او فعال حکومت به‎یې ونه‎کړي.

ورځپاڼې دا هم لیکلي دي چې د مسکو په غونډه کې د افغان حکومت نه‌ګډون تر یوه بریده د امریکا له دریځه هم سرچینه اخلي او دا په‎دې معنی چې امریکایان نه‌غواړي په هغو غونډو کې ګډون وکړي چې د روسیې په نوښت جوړېږي.

ورځپاڼه لیکي چې د مسکو غونډه داسې مهال جوړېږي چې په اوس ورځو کې امریکا هم د سولې په تړاو خپلې هڅې ګړندۍ کړي دي او د دغه بهیر د پر مخ بیولو له‎پاره یې زلمی خلیل‌زاد ګمارلی دی.

ورځپاڼې د خپلې تبصرې په دوام د مسکو په غونډه کې د افغان حکومت د استازو نه‌موجودیت د ناکامه ډیپلوماسۍ زېږنده بللې چې نه‎شي کولای له دا ډول موقعو نه ګټه پورته کړي.

ورځپاڼې په پای کې حکومت ته سپارښتنه کړې چې لا ناوخته شوې نه‎ده او افغان حکومت کولای شي په‎دې غونډه کې په ګډون سره د سېمې په هېوادونو کې خپل ځای برجسته کړي.

• هېواد

هېواد دولتي ورځپاڼې بیا لیکلي دي چې د سولې عالي شورا په مسکو کې د افغانستان د سولې په کنفرانس کې د ګډون له‎پاره چې د جمعې په ورځ جوړېږي یو څلور کسیزه پلاوی استوي.

ورځپاڼې لیکلي دي چې تر دې مخکې د بهرنیو چارو وزارت ویلي وو چې حکومت لا پرېکړه نه‎ده کړې چې د مسکو غونډې ته پلاوی واستوي او که‎نه؟

د ورځپاڼې په وینا طالبانو چې مخکې یې ویلي وو د دوی د قطر دفتر استازي به د مسکو په غونډه کې ګډون وکړي، همدا پرون‌یې ویلي دي چې لا‎ یې پرېکړه نه‎ده کړې چې د مسکو غونډې ته پلاوی واستوي او که نه؟

• انیس

انیس دولتي ورځپاڼې بیا د افغان سولې په تړاو د یو پخواني امریکایی ډیپلومات څرګندونې راخیستي او لیکلي یې دي چې د افغانستان سوله د سیمې د ثبات ضمانت کوي، خو دغه هدف ته د رسېدو له‎پاره نړیوالې اجماع ته اړتیا ده.

ورځپاڼه لیکي چې برناټ روبین وایي چې امریکا د روسیې، چین او ایران له مشارکت پرته په افغانستان کې سوله نه‎شي راوستلی او د ترورېزم په خلاف روانه جګړه نه‎شي ګټلی.

ورځپاڼې د دغه امریکایي ډپیلومات په حواله لیکلي دي چې د امریکا په نوې ستراتېژي کې یوازې پاکستان او هند شامل کړای شوي دي، حال دا چې روسیه، چین او ایران په‎کې نادیده نیول شوي دي.

ورځپاڼې د مطلب په دوام لیکلي دي چې برناټ روبین دا هم ویلي چې امریکا به له طالبانو سره په مخامخ خبرو کې ډېر ژر په‎دې پوه شي چې د سېمې د همکارۍ پرته سوله نه‎شي راوستلی او دا ځکه چې طالبان په‎دې برخه کې یوازې پرېکړه نه‎شي کولای.