د اوربند په تړاو د افغانستان د سولې عالي شورا او د افغانستان د عالمانو د شورا له غوښتنې وروسته "د افغانستان د سرتېري بنسټ" له حکومت او وسلهوالو طالبانو غواړي چې په هېواد کې دایمي اوربند وکړي.
د دغه بنسټ رئیس عبدالقادر وطندوست ځاځي د یکشنبې په ورځ «۱۳۹۷ کال د زمري ۲۸» ازادي راډیو ته وویل:
"له دواړو لورو غواړو چې دایمي اوربند اعلان کړي، دغه اوربند باید د اختر د درې ورځو لپاره نه، بلکې د تل لپاره وي. له وسلهوالو طالبانو هم غواړو چې اوربند وکړي. را دې شي او د سولې خبرې دې ترسره کړي."
دا خبرې په داسې حال کې کېږي چې د روانې اوونۍ د شنبې په ورځ د افغانستان د سولې عالي شورا او د افغانستان د عالمانو شورا، له حکومت او وسلهوالو طالبانو وغوښتل چې د لوی اختر په ورځو کې دې اوربند وکړي.
په افغانستان کې د ډېرو کلونو جګړو وروسته د لومړي ځل لپاره د تېر اختر په درې ورځو کې د حکومت او طالبانو ترمنځ اوربند شوی و.
خو د کوچني اختر له اوربند وروسته وسلهوالو طالبانو بیا جګړه پیل او په غزني، بغلان او ځینو نورو سیمو يې وسلهوالو بریدونو ته زور ورکړ چې په نتیجه کې یې خلکو ته د سر او مال زیانونه واوښتل.
بلخوا د ولسمشرۍ ماڼۍ چارواکو ویلي چې ډېر ژر به وسلهوالو طالبانو سره اوربند اعلان شي.
د افغانستان د سرتېري بنسټ په راټولېدنه کې یو شمېر ځوانانو وویل، دغه اوربند باید د تېر اختر په شان درې ورځې نه، بلکې دایمي وي.
عتیقالله ځاځي وویل:
"ملتونه باید تصمیم ونیسي او غږ پورته کړي لکه د هلمند د خلکو سوله غوښتونکی غږ، د خلکو په تصمیم سره حکومتونه جوړېږي. موږ هم غږ پورته کوو. موږ د هېواد د ځوانانو د قربانیو پلویان نهیوو، موږ د دایمي سولې پلویان یوو."
طالبانو تر اوسه پهدې اړه نظر نهدی څرګند کړی، خو مشر يې "ملا هبتالله" تېره ورځ د لوی اختر په مناسبت د دوی په خپره شوې اعلامیه کې له حکومت سره د اوربند په تړاو هېڅ یادګېرنه نهده کړې.
په ورته وخت کې د سیاسي چارو پوه ودیر صافی وايي، که وسلهوال طالبان د خلکو دغه غږ ته مثبت ځواب ونهوايي، حکومت باید له ډیپلوماتیکو لارو په ملي او نړیواله کچه هڅې پراخې وکړي چې وسلهوال طالبان په هېواد کې دایمي سولې ته اقدام وکړي.
راپور: خان محمد سیند