د روسیې د دفاع مرستیال وزیر د پاکستان سفر کړی او د دې هېواد د پوځ له مشر جنرال قمر جاوید باجوه سرهیې د سیمې د امنیتي وضعیت په ګډون په یو لړ مسایلو خبرې کړې دي.
د پاکستان د پوځ مطبوعاتي څانګې د سې شنبې په ورځ پهدې اړه په یوې خپرې کړې خبرپاڼه کې ویلي:
"د روسیې د دفاع مرستیال وزیر «Colonel General Alexander V. Fomin» پاکستان ته د خپل سفر په اوږدو کې د پوځ له مشر جنرال قمر جاوید باجوه سره په دوه اړخیزو اړیکو او د سیمې پر امنیتي وضعیت خبرې کړې دي."
خبرپاڼه همدا شان زیاتوي:
"پاکستاني او روسي پوځي چارواکو په لیدنه کې د دفاعي او امنیتي همکاریو په پراختیا هم خبرې کړي او همدا شانیې ترهګرۍ ته د ماتې ورکولو لپاره د نړیوالې ټولنې ترمنځ پر ګډې او همکاریزې تګلارې ټینګار کړی دی."
که څه هم د پاکستان پوځي مقاماتو پاکستان ته د روسیې د مرستیال دفاع وزیر د راتګ او د پوځ له مشر سرهیې د لیدنې په اړه خبر ورکړی، خو دا یې نهدي ویلي چې د روسیې د دفاع وزیر پر څو ورځني سفر پاکستان ته تللی و.
پهدې وروستیو کې د روسیې او پاکستان ترمنځ سیاسي او پوځي اړیکې د پخوا په پرتله ډېرې ښې شوي او د دواړو هېوادونو سیاسي او پوځي مشرانو د یو بل هېوادونو ته سفرونه هم کړي دي.
د روان میلادي کال په اپرېل میاشت کې د پاکستان د پوځ مشر جنرال قمر جاوید باجوه د روسيې رسمي سفر وکړ او د دې هېواد له سیاسي او پوځي مشرانو سرهیې د دواړو هېوادونو د پوځي اړیکو پر پراختیا خبرې وکړې.
تر دې وروسته په تېره جولای میاشت کې د پاکستان، ایران، روسیې او چین د استخباراتي ادارو مشرانو په اسلاماباد کې سره ولیدل او په یو لړ سیمهییزو مسایلو یې خبرې وکړې.
د روسیې د بهرنیو استخباراتو د ادارې مشر سرګئي ناریشکین «Sergei Naryshkin» د دغه غونډې په حواله ایراني رسنیو ته ویلي و چې د دغې غونډې ډېر تمرکز پر افغان خاوره د داعش وسلهوالې ډلې د ګواښ د زیاتېدو په اړه وو او دغه ډلهیې ګاونډیو هېوادونو ته ګواښ بللی و.
د یادونې وړ ده چې د روس او پاکستان ترمنځ پوځي او سیاسي همکارۍ پهداسې حال کې د پراخېدو په حال کې دي چې پهدې وروستیو کې په افغانستان کې داعش وسلهوالې ډلې چې روسیې د سیمې لپاره ګواښ بولي، د خپل شتون ثابتولو لپاره پراخ خونړي ترهګریز بریدونه کړي دي.
