د پاکستان او روسیې پوځي چارواکو په روسیه کې سره لیدلي او د دواړو هېوادونو ترمنځیې د پوځي اړیکو پر لا پراختیا خبرې کړې دي.
دا په داسې حال کې ده چې د پاکستان د پوځ مشر جنرال قمر جاوید باجوه د سې شنبې په ورځ په یوه رسمي سفر د روسیې پایتخت مسکو ته تللی دی.
د پاکستاني پوځ د عامه اړیکو اداره «ISPR» پهدې اړه په یوه خپور کړي بیان کې ویلي:
"جنرال قمر جاويد باجوه د روس په رسمي سفر مسکو ته رسېدلی او هلتهيې د روس د ځمکني پوځ له قوماندان جنرال اوليګ ساليوکوف سره په کرملېن کې ليده کاته کړي دي."
خبرپاڼه زياتوي:
"له جنرال قمر جاوید باجوه سره د لیدنې پر مهال اوليګ ساليوکوف وويل چې پاکستان له جيو ستراتېژیک پلوه يو مهم هېواد دی او دوی غواړي چې ورسره د پوځونو په کچه اړيکې پراخې کړي."
خبرپاڼه کاږي چې ساليوکوف د ترهګرۍ پر ضد جګړه کې د پاکستان لاسته راوړنې او د سيمې په ثبات کې يې د دې هېواد د رول ستاينه کړې او کاږي:
"جنرال قمر جاويد باجوه د پوځونو په کچه د اړیکو پر پراخولو ټینګار وکړ او ويېويل چې روسيې د سیمې په پېچلو حالاتو کې مثبت رول لوبولی دی."
پهدې وروستیو کې د پاکستان او روسیې ترمنځ اړیکې د تېر په پرتله ډېرې غوړېدلي او د دواړو هېوادونو سیاسي او پوځي مشرانو اسلاماباد او مسکو ته سفرونه هم کړي دي.
د دې تر څنګ د پاکستان او روسیې پوځيانو په پاکستان او روسیه کې په لومړي ځل ګډ پوځي تمرینات هم کړي او پاکستان په پېښور کې د روسیې افتخاري قونسلګرۍ هم پرانیستې ده.
د یادونې وړ ده چې د سیاسي چارو ځیني کارپوهان د اسلاماباد او مسکو پراخېدونکې اړیکې پهدې وروستیو کې د پاکستان او امریکا د کړکېچنو اړیکو نتیجه بولي.
