په کوزه پښتونخوا کې د پښتون ژغورنې غورځنګ مشر منظور پشتین وايي، پهداسې حال کې چې په بېلابېلو سیمو کې د دې غورځنګ ملاتړي ځورول کېږي او بریدونه پرې کېږي، له پاکستاني ریاست سره مذاکراتو ته ډېره تمه نهشته.
د دې غورځنګ مشر منظور پشتین ازادي راډیو ته په یوې ځانګړې مرکه کې وویل، نهیوازې چې پاکستاني پوځ د دوی غوښتنې نهدي منلي، بلکې په ټول پاکستان کې یې د دوی پر ملاتړو فشارونه زیات کړي دي.
نوموړي زیاته کړه، یوازې په تېرو درې ورځو کې په واڼه او انګور اډه کې د دې غورځنګ پر پلویانو بریدونو کې شپږ کسان وژل شوي او تر ۴۰ زیات نور ټپیان دي.
دی وايي:
"په اسلاماباد کې زموږ ۳۷ ملاتړي د دوشنبې په ورځ پولیسو نیولي، نهیې د مدافع وکیل حق ورکړی او نهیې تر اوسه محکمې ته وړاندې کړي، بلکې د ۱۴ ورځو په مخهیې زندان ته استولي دي. همدارنګه په واڼه کې د پښتون ژغورنې غورځنګ پر فعالانو برید کې ۴۶ کسان ټپیان شوي او ۵ مړه دي. په انګور اډه کې بیا د ځايي انتظامیې په ډزو یو کس وژل شوی او پنځه ټپیان دي."
نوموړي د پښتون ژغورنې غورځنګ د بل مشر علي وزیر په اړه چې واڼه کې پرې برید شوی، وویل هغه لا هم واڼه کې دی او خوندي دی، خو د عارف په نومیې د کورنۍ یوازنی زلمی ټپي دی.
د پاکستان پوځ د ویاند د هغو څرګندونو په اړه چې په واڼه کې د پښتون ژغورنې غورځنګ پر پلویانو برید د امن په نوم د ځايي کمېټې غړو کړی دی، منظور پشتین وویل:
"د پاکستان پوځ چې کوم طالبان ساتي دوی ورته بېلابېل نومونه ورکوي، کلهیې د امن کمېټې بولي، کلهیې ښه طالبان بولي، خو تر ټولو ډېرې وژنې، د خلکو ځورول او ترهګرۍ خپرول د همدې ډلې کار دی. کله چې د طالب نوم بد شو، نو دوییې نوم وربدل کړ او د امن کمېټې نومیې پرې کېښود."
منظور پشتین ازادي راډیو ته وویل، پهداسې حال کې چې د دوی د غورځنګ پر فعالانو بریدونه کېږي او ملاتړي یې وژل کېږي، ټپیان کېږي او یا بندیان دي، د پاکستاني پوځ سره ښايي د جرګو له لارې مذکرات ونهشي.
منظور پشتین د خپلو غوښتنو په اړه یو وار بیا وویل چې غوښتنې یې په پاکستان کې د پښتنو د اساسي حقونو او ژوند غوښتنې دي؛ دا چې دوی دې په زور تري تم کېږي نه او په صحرايي محاکمو کې دې نهوژل کېږي او سیمې دې د ترهګرۍ د روزنې ځالې نهوي.
نوموړي هغه راپورونه هم تأیید کړل چې ګوندې شمالي وزیرستان کې بیا د پاکستان د پوځ لهخوا طالبان ځای پر ځای شوي دي.
منظور پشتین د پاکستان پوځ د ویاند اصف غفور هغه څرګندونې هم رد کړې او د خندا وړ یې وبللې چې ویلیې د پښتون ژغورنې غورځنګ د بهرنیو هېوادونو لهخوا د پاکستان د پوځ پر ضد کارول کېږي.
منظور پشتین وویل، مبارزه بهیې تر هغې دوام وکړي، څو چې د پښتنو په سیمه امن نهوي ټینګ شوی او دې خلکو ته د ژوند کولو حق نهوي ورکړل شوی.
