په داسې حال کې چې افغان ولسمشر محمد اشرف غني د روان تعلیمي کال په پیل کې، د شپږو زرو ښوونځیو د ودانیو د جوړولو خبره کړې وه، تراوسه د یوه ښوونځي لپاره هم ودانۍ نه ده جوړه شوې.
له زده کوونکو سره د ولسمشر محمد اشرف غني له دغې ژمنې څه باندې دوه میاشتې تېرېږي.
د کلیو د پراختیا وزارت چې د دغو ښوونځیو د ودانیو د جوړولو مسؤلیت ورترغاړې دی، وايي چې د دغو ښوونځیو د ودانیو د جوړولو طرحه بشپړه شوې، خو له نړیوال بانکه یې د مالي امکاناتو په تمه دی.
د دغه وزارت ویاند اژند د شنبې په ورځ ازادي راډیو ته وویل، په پام کې ده چې په روان مالي کال کې د ۳۰۰۰ ښوونځیو لپاره ودانۍ جوړې شي.
نوموړی وایي:
"موږ په لومړي ګام کې د پوهنې له وزارته د اړتیاو فهرست ترلاسه کړی، د ۶۰۰۰ ښوونځیو د ودانیو د جوړولو لپاره ټولې طرحې او پلانونه بشپړ شوي او نړیوال بانک ته منتظر یوو چې مالې مرسته ورته برابره کړي."
د ده په خبره، د دغو ۶۰۰۰ ښوونځیو د ودانیو د جوړولو بودجه چې شااوخوا ۲۰۰ میلیونه ډالره اټکل شوې، د نړیوال بانک له خوا تأیید او وروستۍ شوې او په لږوخت کې به ېې افغان حکومت ته ورکړي.
ده داهم وویل چې دغه ښوونځي د ښاري میثاق د پروګرام په چوکاټ کې جوړېږي.
په ورته وخت کې د پوهنې وزارت د خپرونو رئیس کبیر حقمل وايي، د ښوونځیو لپاره د ودانیو نشتوالی د زده کوونکو پر روحیې او د تدریس پر بهیر منفي اغېز کوي.
دی وایي:
"د ښوونې او روزنې یو اساسي رکن د خوندی چاپېریال شتون دی چې په خواشینۍ سره، موږ ترې برخمن شوي نه یوو، د پوهنې وزارت ۴۵ فیصده ښوونځي ودانۍ نه لري."
ده وویل، په مرکز او ولایتونو کې اته زره ښوونځي ودانۍ نه لري.
بل خوا د پوهنې یو شمېر پوهان وايي، ناامني، اداري فساد، د ظرفیتونو کموالی او د تدارکاتو پېچلې پروسه، ښوونځیو ته د ودانیو جوړولو د بهیر پر وړاندې، عمده خنډونه دي.
راپور: خان محمد سیند