د افغانستان د عامې روغتیا وزارت وايي، د هېواد په ۱۳ ولايتونو کې ۲۰۶ روغتيايي مرکزونه جوړېږي.
د عامې روغتیا وزیر زیاتوي چې دغه روغتیايي مرکزونه په هرات، کندهار، پکتیا، پکتیکا، خوست، بدخشان، تخار، بغلان، جوزجان، فاریاب، بامیان، غزني او کابل کې جوړېږي.
د يادو شویو پروژو قراردادونه د سې شنبې په ورځ «۱۳۹۷ کال د وري ۱۴» د عامې روغتيا وزير ډاکتر فېروز الدين فېروز او د تطبیق کوونکو مؤسسو ترمنځ لاسليک شول.
ښاغلي فیروز د دغو قراردادونو په تړاو وویل:
"په مجموعي ډول دغه قراردادونه د نهه نیم میلیونه ډالرو په ارزښت دي، د ناامنیو تر څنګ زموږ وضعیت مخ په ښه کېدو دی او هیلهمند یو چې نور افغانان دننه په هېواد کې له بشپړو روغتیایي اسانتیاوو برخهمند شي."
نوموړي همدارنګه څرګنده کړه چې د يادو شویو قراردادونو له مخې په دغه ولايتونو کې د روغتيايي کار کوونکو تنخواګانې هم ۴۰سلنه لوړې شي.
د افغانستان د عامې روغتیا وزارت تر دې وړاندې هم د هېواد په ۱۸ ولايتونو کې د روغتيايي خدمتونو د وړاندې کولو یو شمېر مرکزونه جوړ کړي دي.
د روغتیايي خدماتو د وړاندې کولو کیفیت باید معیاري او باکیفته وي.
خو د افغانستان د ولسي جرګې د روغتیا کمېسیون رئیس مجیبالرحمن څمکني په دغې غونډه کې له عامې روغتیا وزارت څخه وغوښتل چې د روغتیايي خدماتو د وړاندې کولو کیفیت ته ډېره پاملرنه وکړي.
نوموړی وايي:
"د روغتیايي خدماتو د وړاندې کولو کیفیت باید معیاري او باکیفته وي، باید ترې څارنه وشي، که خدمات لږ وي یا ډېر باید لومړیتوب کیفیت ته ورکړل شي."
د ولسي جرګې غړي وايي، که له روغتیايي مرکزونو په سمه توګه څارنه ونهشي یوازې د روغتیايي مرکزونو د شمېر په ډېرېدو سره به د خلکو ستونزې هوارې نهشي.
راپور: ناجیه ساپۍ