د افغانستان د کوچیانو یوشمېر استازي دوی ته د حکومت د نه پاملرنې له امله شکایت لري او وايي چې د ژوند په بېلابېلو برخو کې له ګڼو ستونزو سره مخ دي.
کوچیان وايي، د ښوونځیو، روغتیايي کلینیکونو، د څښاک د پاکو اوبو نشتوالی او د څړ ځایونو غضب هغه عمده ستونزې دي چې دوی ورسره لاس او ګریوان دي.
دوی چې د شنبې په ورځ له ۳۴ ولایتونو د خپلو ستونزو د شریکولو او د دغو ستونزو د هواري په هدف، په کابل کې د لویې جرګې په خیمه کې سره راټول شوي، حکومت کوچیانو ته په نه پاملرنه تورن کړ او ویې ویل چې په وزارتونو او ان د ولایتونو په څوکیو کې دوی ته ونډه نه ده ورکړل شوې.
د کوچیانو د شمال او شمال ختیځ زون دوو تنو استازو ملک میرحمزه او عبدالحق حقیار په دې اړه وویل:
"په ټول افغانستان کې زموږ څړځایونه غضب شوي، کوچیان له فقر او بې وزلۍ سره مخامخ دي، حکومت باید کوچیانو ته د کار زمینې برابرې کړي او د کوچیانو ریاست په وزارت بدل شي."
"کوچیان کوم اضافي بار نه دی، هر څه چې ورباندې راځي، را دې شي، زموږ کوچیان د دغه هېواد اصلي وارثین دي او باید ژوند ته یې پاملرنه وشي."
په ورته وخت کې د کوچیانو چارو د سمون رئیس دلاور فیضان وايي، که څه هم د کوچیانو د خدمت لپاره هلې ځلې کوي، خوغږ یې د کابینې د غړو په ګډون، د حکومتي چارواکو له خوا نه اورېدل کېږي.
دی زیاتوي:
"نېږدې دوه کاله کېږي چې زه دلته رئیس یم او اعتراف کوم چې ما د کوچیانو لپاره هېڅ کار ونه کړ، حتی په څلورو میاشتو کې د کابینې غړو ما او زما ټيلیفون ته ځواب نه دی ورکړی."
د افغانستان له ۳۴ ولایتونو زرګونه دغه کوچیان د شنبې په ورځ په کابل کې د لویې جرګې په خیمه کې سره راټول شوې وو.
دوی په دغه ناسته کې د حکومت د سولې له طرحې، د برښنايي تذکرو د وېش او دغه شان له راتلونکو انتخاباتو خپل ملاتړ اعلان کړ.
کوچیان وايي، دوی چې په ټولو ملي پروسو کې برخه اخيستې او باید له پامه ونه غورځول شي.
خو د افغانستان جمهوري ریاست بیا وايي چې د کوچیانو د ژوند ښه والي ته یې تل پام کړی او په دې برخه کې به خپلې هڅې جاري وساتي.
د جمهوري ریاست مرستیال ویاند دواخان مینه پال په دې اړه ازادي راډیو ته وویل:
"حکومت د کوچیانو حقونو ته متوجه دی او دوی هم د افغانستان د نورو وګړو په څېر مساوي حقوق لري، حکومت د تعلیم او روغتیا په برخو کې هغوی ته پام کړی او په راتلونکې کې به یې هم ستونزې حل کړي. "
په ورته وخت کې د کوچیانو چارو د سمون خپلواک ریاست وايي چې کابل ته راغلي د کوچیانو یو شمېر استازي به د خپلو ستونزو د هواري په هدف، له ولسمشر سره هم وګوري.
راپور: رحمت الله افغان