د بلخ ولایتي شورا وايي چې د ولسمشرۍ ماڼۍ لهخوا د بلخ د پخواني والي عطا محمد نور د استعفا منظوري د نهمنلو او غیر قانوني عمل دی.
د بلخ د ولایتي شورا مشر افضل حدید ازادي راډیو سره په خبرو کې وویل چې عطا محمد نور دا استعفا یو کال دمخه د ولسمشرۍ ماڼۍ سره د سیاسي مذاکراتو په جریان کې په دې شرط وړاندې کړې وه چې د دواړو لورو ترمنځ شوې هوکړې عملي بڼه خپله کړي.
د بلخ د ولایتي شورا مشر وویل که ارګ د عطا محمد نور تبدیلي غواړي، نو باید یې په ابرومندانه توګه دا کار ترسره کړای وی.
ښاغلي حدید زیاته کړه:
"که تبدیلېږي، یوه ابرومندانه تبدیلي دې وي او له هغه غوښتنو سره چې د بلخ والي درلودې او یا هم له انعطاف پذیري څخه دې کار واخیستل شي. دا چې مشکل حل شي باید یې مدیریت وشي."
د بلخ د پخواني والي عطا محمد نور استعفا د لیندۍ میاشتې په ۲۷مه نېټه د ولسمشر محمد اشرف غني لهخوا منظور شوه او د ارګ د مطبوعاتي مرستیال ویاند نجیبالله ازاد په خبره چې دا استعفا خپله ښاغلي عطا محمد نور څه موده مخکې ولسمشرۍ ماڼۍ ته وړاندې کړې وه.
د بلخ پر ولایتي شورا سربېره خپله عطا محمد نور او د جمعیت ګوند هم د ولسمشر له لوري د بلخ د والي د استعفا منظوري یو غیر قانوني او د افغانستان د امنیت او ثبات ضد عمل په ګوته کړی.
د افغانستان د ولسمشرۍ ماڼۍ تر دې دمه د جمعیت ګوند د یادو څرګندونو په اړه کوم غبرګون نهدی ښودلی.
په عین وخت کې بیا د مزار شریف ښاریان د عطا محمد نور د استعفا د منظورۍ په اړه بېلابېل نظریات لري.
د بلخ څو تنه اوسېدونکي یې په اړه وايي:
"عبدالفتاح یم، د دهدادي ولسوالۍ اوسېدونکی، ولسمشرۍ ماڼۍ باید دا عمل نهوی ترسره کړی، ځکه چې د عطا محمد نور حضور په بلخ کې ګټور کار دی او د هغه په شتون دلته امنیت تأمین و."
"زما نوم نجیبالله دی، د بلخ د محاسبې او حسابدارۍ انسټټیوټ محصل یم، زه نه د ولسمشر غني پلوي کوم او نه هم د عطا محمد نور، دوی دې سره خپلو کې جوړ شي او داسې تصمیم دې غوره کړي چې د ملي ګټو او خلکو په خیر وي."
"زه قاسم یم، د مزار شریف یو هټۍوال، د بلخ د والي لیرې کېدل سم کار نهدی او نوی کس چې راځي څوک څه پوهېږي چې د هغه په راتګ سره به امنیت ښه شي او که بد. د راتلونکي وړاندوینه ستونزمن کار دی، خو د عطا محمد نور حضور دلته د ټولو په ګټه و."
د بلخ ولایتي شورا په داسې حال کې د عطا محمد نور د استعفا په باب د ولسمشرۍ ماڼۍ د تصمیم پر وړاندې غبرګون ښيي چې تر دې دمخه خپله عطا محمد نور ویلي و چې په راتلونکو وختونو کې به د بلخ ولایت له مقام استعفا ورکړي او بل کس ته به د ښې حکومتوالۍ د تمثیل زمینه مساعده کړي.
راپور: مجیبالرحمن حبیبزی
