د افغان حکومت اجرائیه رئیس عبدالله عبدالله هند ته د خپل سفر په ترڅ کې د پنجشنبې په ورځ ناوخته د هند له لومړي وزیر نریندرا مودي سره وکتل او په یو شمېر مهمو اقتصادي، سیاسي او امنیتي مسایلو هوکړې ته ورسېدل.
د اجرائیه ریاست ویاند مجیب الرحمن رحیمي په نوي ډيلي کې ازادي راډيو ته وویل چې په دې کتنه کې د دواړو هېوادونو د بهرنیو چارو مرستیال وزیرانو هغه تړون هم تبادله کړو چې له مخې به يې هند افغان پولیسو ته روزنه ورکوي.
ښاغلي رحیمي زیاته کړه:
"په دې ناسته کې یو نوی تفاهملیک هم لاسلیک شو چې له مخې به يې هندوستان یو شمېر افغان پولیسو ته په هند کې روزنه ورکوي، همدا شان اجرائیه رئیس وړاندیز وکړو چې هند باید د افغان سرتېرو د تدواۍ په برخه کې خپله همکاري زیاته کړي چې د هند د لومړي وزیر لهخوا ومنل شوه او خپلو خلک ته يې هدایت وکړو چې دې مسئلې ته باید زر تر زره رسېدنه وشي."
دې وویل چې په دې کتنه کې ښاغلي عبدالله د افغانستان او جنوبي اسیا لپاره د امریکا نوې ستراتیژي یو فرصت وباله او وې ویل چې د امریکا نوې تګلارې د سیمې د امنیت او د ترورېزم په وړاندې د مبارزې او د ترورستانو د پټنځایونو د لهمنځه وړلو لپاره زمینه برابره کړې ده.
همدا شان ښاغلي رحیمي وویل چې په دې کتنه کې په دې هم هوکړه وشوه چې هند به په جګړه کې د ټپي شوېو افغان سرتېرو درملنې په برخه کې همکاري ډېروي.
نوموړي وویل چې عبدالله عبدالله د هند له لومړي وزیر غوښتنه وکړه چې په افغان سوداګرو د مالیې د لغوه کولو ترڅنګ هغوی ته لا زیاته زمینه برابره کړي.
د اجرائیه ریاست ویاند زیاته کړه چې په دې کتنه کې د هند لومړي وزیر په پاکستان کې د تروریستانو د مرکزونو د لهمنځه وړلو په برخه کې د امریکا د نوې ستراتیژۍ ملاتړ وکړو.
په دې کتنه ښاغلي مودي دغه شان په هندوستان کې د افغان پولیسو د روزنې ملاتړ وکړ او په دې برخه کې يې د هر ډول همکاریو ژمنه وکړه.
ښاغلي عبدالله له دې وروسته د هندوستان له ولسمشر رام نات کوویند سره هم وکتل او په دې کتنه کې د هند ولسمشر ټینګار وکړ هېواد يې په ټول توان سره په افغانستان کې د سولې او ثبات ملاتړ کوي.
له دې وړاندې د پنجشنبې په ورځ د افغان حکومت اجرائیه رئیس په نوي ډیلي کې د سوکالۍ پر لور د افغاني تولیداتو په یو نندارتون کې تر برخې اخېستو وروسته په یوه خبري ناسته کې ترورېزم د سیمې او نړۍ لپاره ګډ خطر یاد کړ.
ښاغلي عبدالله وویل چې افغان حکومت له ټولو ګاونډیو هېوادونو سره د ښو اړیکو سیاست چلوي او هېچاته د افغانستان په بهرني سیاست کې د ویټو حق نه ورکوي.
نوموړي وویل، هېڅ هېواد باید د افغانستان او نورو هېوادونو ترمنځ د اړیکو په اړه اندېښنه ونهکړي ځکه په وینا يې افغانستان هېڅکله نورو هېوادونو ته ستونزې نه دي جوړي کړي.
ښاغلي عبدالله زیاته کړه:
"په اول قدم کې هر هېواد خپلې ملي ګټې تعریفوي او له ګاونډیو سره زموږ د اړیکو په اساس د خپلو ملي ګټو تعریف همدا دی چې موږ له ټولو ګاونډیانو سره د نیکو اړیکو غوښتونکي یو او همدا هیله له ټولو لرو، افغانستان هېڅ وخت بل ګاونډي ته خطر نه وو او نهدی، که کوم هېواد د افغانستان او نورو هېوادونو ترمنځ د اړیکو په برخه کې ځانته د ویټو کولو حق ورکړي نو افغان حکومت به هېڅکله اجازه ورنهکړي. "
ښاغلي عبدالله همدا راز د افغاني تولیداتو دا نندارتون مهم وباله او ويې ویل هیله لري چې هندي سوداګر به د افغاني توليداتو لپاره د مارکیټ په پيدا کېدو کې مرسته او همکاري وکړي.
نوي ډیلي کې د افغاني تولیداتو نندارتون
د دې سفر په ترڅ کې ښاغلي عبدالله له هندي پانګهوالو سره ناسته درلوده.
نوموړي هندي پانګهوالو ته په افغانستان کې د پانګونې بلنه ورکړه او ډاډ يې ورکړو چې افغان حکومت ژمن دی چې بهرنیو پانګهوالو ته د پانګهونې په برخه کې هر ډول اسانتیاوې برابرې کړي.
له ښاغلي عبدالله سره په دې سفر کې د کابینې د یو شمېر وزیرانو په ګډون نږدې ۲۰۰ افغان سوداګر ملتیا کوي.
راپور: اکرام الله اکرام
