د افغانستان د خلکو د محور په نوم د سیاسي جریان غړي وايي، د حکومت نه مشروعیت ټول افغان دولت غیرقانوني ګرځولی دی.
دوی وايي، د ملي وحدت حکومت نه مشروعیت او کمزورو کړنو دا وخت د ټول افغان دولت مشروعیت تر پوښتنې لاندې راوستی دی.
د دغه ګوند غړي صدیق پتمن د پنجشنبې په ورځ د ملي وحدت حکومت د درې کلن مزل د څېړلو غونډې ته وویل، د ملي وحدت حکومت له پیله د اساسي قانون خلاف رامنځته شوی خو کړنو یې لا غیر مشروع کړی دی.
ښاغلي پتمن زیاته کړه:
"اوس موږ په داسې پړاو کې یو چې دولت مشروع نهدی د حکومت نه خبره وتلي ده. ځکه هر هغه پارلمان چې د هغې عمر پای ته رسیدلای وي لکه د افغانستان که هغه قضائیه قوې ته رأیه ورکړي قضایه قوه مشروع نهده او که هغه اجرائیه قوې ته رأیه ورکړي اجرائیه قوه مشروع نهده کله چې مور قوه خپل قانوني مشروعیت له لاسه ورکړي د هغې نه چې هر څه پیدا کېږي هغه قانوني نهدي."
د افغانستان د خلکو د محور په نوم سیاسي جریان د روان کال د چنګاښ په میاشت کې د حکومت د اپوزسیون په توګه د موجودیت اعلان وکړ چې پهکې تر ډېره د پخواني حکومت چارواکي شامل دي.
تر دغه خوځښت مخکې ګڼو نورو بنسټونو او د انورالحق احدي په مشرۍ نوي ملي جبهې هم د ملي وحدت حکومت په جوړښت او د کار په دوام تل انتقادونه کړي دي.
د چارو یو شمېر کارپوهان وخت نا وخت د یادو سیاسي خوځښتونو او کړېو دا ډول انتقادونه د امتیاز اخېستلو او شهرت موندلو لباره یوه بهانه ګڼي، خو افغان ولسمشر مطبوعاتي سلاکار نبي مصداق وايي، نظر ورکول د خلکو او ګوندونو حق دی.
دی وايي:
"دا نوی حرکت دا خپله وظیفه ګڼي چې دا موضوع را پورته کړي ځکه دلته انتخابات راروان دي، دا خبرې تکراري دي، نوي څه پهکې نشته، ولې داسې خبرې دي چې باید وویل شي او باید په اړه یې تصمیم ونیول شي."
د حقوقي چارو کارپوه برنا صالحي بیا په دې اړه ازادي راډيو ته وویل، خوځښتونه بالعموم د دا ډول انتقادونو له لارې غواړي د حکومت پر وړاندې د خلکو احساسات را وپاروي او امتیازات تر لاسه کړي.
خو د خلکو د محور مشرانو بیا ویلي، دوی حکومت ته نیکې مشورې ورکوي او د ملي وحدت حکومت د ړنګولو او یا په دغه حکومت کې د ونډې اخېستلو اراده نهلري.
راپور: یوسف خان ځدراڼ