د ولسي جرګې وکيل ظاهر قدير د امریکا پر نوې اعلان شوې ستراتيژۍ انتقاد وکړ چې د سولې پرځای په کې د جنګ دوام شوی.
نوموړي دا څرګندونې د جمعې په ورځ په ننګرهار کې د مشرقي شورا لهخوا جوړې شوې غونډې ته وکړې چې په زرګونو کسانو په کې برخه اخېستې وه.
ظاهر قدير په خپلو خبرو کې د امریکا لهخوا پر نوې اعلان شوې ستراتيژۍ نيوکه وکړه او ټینګار يې وکړ چې داعش سره دې جګړه وشي خو طالب سره دې سوله:
"دې ستراتيژۍ کې د جنګ دوام ته ډېر زیات ځای ورکړل شوی مګر سولې ته هېڅ ځای نهدی ورکړل شوی، موږ جنګ غواړو خو د داعش سره ښه په کلکه ځکه هغوی سره د سولې هېڅ جواز نشته خو طالبانو سره سوله وکړئ، که د حکومت او نړیوالې ټولنې زور نه رسيږي، ولس دې ته تیار دی زه دې ته تیار یم چې طالبانو سره خبرې وکړم. "
ښاغلي قدير په خپلو خبرو کې هغه اوازې په کلکه رد کړې چې ګوندې دی د کوم سیاسي ائتلاف په ملاتړ لګيا دی.
نوموړي وويل، دی د هېڅ ائتلاف سره نهدی او یوازې د ولس د حق غوښتنې په خاطر يې ولسي حرکت پيل کړي:
"زه د دې ولس استازی یم، د کوم شخص استازی نه یم او نه د کوم سیاسي ګوند سړی یم او نه مې کومې سیاسي ډلې نه تراوسه ملاتړ اعلان کړی. "
په دې غونډه کې د نورو ځوانانو او قومي مشرانو تر څنګ د ننګرهار پوهنتون د انجنيري پوهنځي استاد شاکر فاروقي وويل، په اوسني نظام کې ظلم، فساد، غصب او د قانون خلاف نورې کړنې اوج ته رسیدلي.
دی وايي، د دې ناخوالو پرضد به مدني حرکتونه کوي او که اړتیا شوه د سر په قیمت هم مبارزې ته تيار دي:
"محصلین د دې ټولنې هغه ځوان قشر دی، سبا ډاکټر دی، قاضي دی، څارنوال دی، دوی ته توجه نهکېږي، ماسټري نشته،تعليمي بورسونه نشته دوی مجبور دي مدني حرکتونه به کوي مجبور دي غره ته به خيژي زما وژل که دلته کوي سبا غره کې وکړه د هېچا پروا نهلرم. "
د غونډې نورو برخهوالو هم په خپلو خبرو کې پر افغان حکومت نیوکه وکړه چې د مشرقي خلکو پر حق يې سترګې پټې کړي او ګواښ يې وکړ که چيرې د ختیځې سیمې ولسونو ته حق ورنهکړل شي دوی به پراخو مدني حرکتونو ته دوام ورکړي.
ننګرهار ـ شاه محمود شینواری