چارواکي وايي، تېره شپه د کندهار په ارغستان او د زابل په شملزو ولسوالۍ کې د سرحدي پولیسو پر پوستو د وسلهوالو طالبانو په حمله کې ۷ سرحدي پولیس او ۳۰ وسلهوال وژل شوي، لس پولیس او ۳۰ وسلهوال ټپیان دي.
د کندهار د امینې قوماندانۍ ویاند ضیا دُرانی وايي، تېره شپه وسلهوالو طالبانو د ارغستان ولسوالۍ په وام دره کې د سرحدي پولیسو پر پوستو حملې کړې.
د دُراني په وینا په دغه بریدونو کې چې تر سهار يې دوام درلود ۳ سرحدي پولیس او شل وسلهوال طالبان وژل شوي ۵ سرحدي پولیس او ۱۵ وسلهوال ټپیان شوي دي.
د دُراني په خبره په وژل شوېو کې د غیرت په نوم د وسلهوالو طالبانو یو مهم قوماندان هم شامل دی.
دی وايي:
"دا بریدونه چې تر سهار پنځو بجو يې دوام کړی، د غیرت په شمول شل وال وژل شوي او ۱۵ نور ټپیان شوي زموږ ۳ سرحدي پولیس شهیدان شوي او ۵ سرحدي پولیس ټپيان دي چې اوس تر درملنې لاندې دي."
دُرانی وايي، هممهاله وسلهوالو د زابل په شلمزو کې هم د سرحدي پولیسو پر پوستو بریدونه کړي.
د دُراني په خبره دغه بریدونو کې چې تر سهاره يې دوام کړی لس وسلهوال طالبان او څلور پولیس وژل شوي ۱۵ وسلهوال طالبان او ۵ پولیس ټپیان شوي دي.
وسلهوالو طالبانو تراوسه په دې اړه څه نهدي ویلي.
د کندهار پر شمالي ولسوالیو په وروستیو دوو میاشتو کې د وسلهوالو طالبانو حملې زیاتې شوي دي.
د ارغستان ریګستان، نېښ،میانشین، شاولي کوټ او خاکریز ولسوالیو پر امنیتي پوستو وسلهوال نېږدې هره شپه حملې کوي.
د وروستیو معلوماتو پر اساس وسلهوالو طالبانو په خاکریز شاولي کوټ ارغستان او ریګستان ولسوالیو کې زیات شمېر پوستې سقوط کړي او د ولسوالیو مرکزونو ته نېږدې شوي دي.
امنیتي چارواکي هم په دغه سیمو کې د طالبانو پرمختګ مني او وايي چې ډېر ژر به د نیول شوېو سیمو څخه وسلهوال پر شاه کړي.
راپور: محمدصادق رښتینی
