د "سیاسي ګوندونو کور" او یو شمېر مدني او ټولنیز بنسټونه، په هېواد کې د جګړو او په لارو کې د شوکمارو د فعالیتونو پر زیاتېدو اندېښنه ښیي او له حکومت نه غواړي چې مخهیې ونیسي.
د «سیاسي ګوندونو کور» او د یو شمېر مدني او ټولنیزو بنسټونو مسؤلین، د ترورېستانو د بریدونو زیاتېدو ته په کتو سره، له حکومت او نړیوالې ټولنې غواړي چې د ترورېزم پر وړاندې مبارزه جدي او د خلکو د وژنو مخه ونیسي.
دوی د پنجشنبې په ورځ په کابل کې په یوې غونډه کې وویل چې ترورېستي ډلو د هېواد په مرکز او ولایتونو کې فعالیتونه زیات کړي دي.
د «افغانستان واحد ګوند» رئیس محمد عمر عیار وویل، په افغانستان کې د امریکا او نړیوالې ټولنې له موجودیت سره سره، بیا هم په دې هېواد کې ناامني زیاته شوې ده.
نوموړي زیاته کړه:
"ځان وژونکې حملې، غلا او د خلکو وژنه ورځ په ورځ زیاتېږي او سره له دې چې ناټو او امریکا په دې هېواد کې حضور لري، خو په خواشينۍ سره چې د خلکو وژنه له یوې ورځې نه بلې ته زیاتېږي، باید اصلي مقصر وموندل شي او د خلکو د وژنو مخه ونیول شي. د خلکو صبر او زغم نور ختم شوی دی."
په دغې غونډه کې د افغانستان د سولې د ګوند مشر شاه محمود پوپل، د روانو ستونزو لامل، په حکومت کې د سیاسي ګوندونو استازو ته برخه نهورکول او د افغانانو پر وړاندې د نړیوالې ټولنې د ژمنو، نهپلي کېدل په ګوته کړل.
د دغې غونډې په پرېکړهلیک کې د ترورېزم پر وړاندې د ګاونډیو هېوادونو پر همکارۍ، د حکومت او نړیوالې ټولنې لهخوا د استخباراتي او کشفي فعالیتونو پر زیاتوالي، په دولتي ادارو کې د اصلاحاتو په راوستلو او د افغان ځواکونو په لاتجهیزولو ټینګار شوی دی.
په دې وروستیو کې په کابل، هرات او ځینو نورو ولایتونو کې د وسلهوالو ډلو د حملو په نتیجه کې، ګڼ شمېر خلک وژل شوي او ټپیان شوي دي.
دا په داسې حال کې ده چې وسلهوالو حمله کوونکو د سې شنبې په شپه د هرات ښار پر جوادیه جومات د لمانځه د اداء کولو پر مهال برید وکړ چې د امنیتي مسؤلینو د معلوماتو له مخې، په دغه برید کې ۳۳ کسان ووژل شول او ۶۰ ټپیان شول.
سربېره پر دې د تېرې دوشنبې په ورځ یو شمېر حمله کوونکو په کابل کې د عراق پر سفارت برید وکړ چې د کورنیو چارو وزارت وویل، دوه کسان پهکې وژل شوي او درې ټپیان شوي دي.
د دغو بریدونو مسؤلیت داعش ډلې منلی.
داعش ډلې د هرات پر "جوادیه" جومات د انتحاري حملو مسؤلیت ومانه
په ورته وخت کې د کورنیو چارو وزارت وايي، وسلهوال مخالفین د امنیتي ځواکونو پر وړاندې کمزوري شوي او د ملکي خلکو وژلو تهيې مخه کړې ده.
د دغه وزارت ویاند نجیب دانش ازادي راډیو ته وویل، د مخالفینو د حملو او د خلکو د وژنو د مخنیوي په هدف، د نړیوالې ټولنې د مرستو جلبولو هڅې روانې دي.
نوموړي زیاته کړه:
"موږ د نړیوالې ټولنې ملاتړ او همکاري له ځانه سره لرو، هغوی له افغان ځواکونو سره اوږه په اوږه، د مشورې ورکولو او د افغان ځواکونو د تجهیز په برخو کې هڅې کوي او موږ هم هڅه کوو چې وضعیت ښه کړو او دغه ستونزې له مخې لیرې کړو."
ښاغلي دانش وویل، د هېواد او په تېره د کابل ښار لپاره د نوي امنیتي پروګرام په جوړولو کار پیل شوی چې په پلي کېدو سره بهیې، روان وضعیت ښه شي.
پخوا تر دې ولسمشرۍ ماڼۍ هم د څلور کلن امنیتي پلان د طرحې د جوړولو او د امنیتي ستونزو د هواري خبره کړې ده.
راپور: خان محمد سیند
